اخنوش ل"كود": ديما موجود فالميدان واساليب ماشي ديال ولاد الناس توظفات باش توقف دينامية الحزب طيلة 5 سنين وربحناها بثقة المواطن وها علاش ختاريت الترشح للبلديات وفاكادير

قال عزيز اخنوش رئيس التجمع الوطني للاحرار فحوار حصري غادية تنشرو "كود" لاحقا٬ انو ما غابرش وباللي ديما "ديما موجود فالميدان ورفقة مناضلات ومناضلي التجمع الوطني للأحرار، ورفقة المغاربة اللي حنا ديما قراب منهم من خلال جميع الأنشطة والجولات اللي كنديرو فالميدان، واللي ولات بصمة ديال الحزب"
كما اكد رئيس التجمع الوطني للاحرار انو كيعتابر راسو "واخد حقي وكنقوم بخرجات عديدة، في الحدود اللي كتسمح بيها الأجندة ديالي ما بين العمل الميداني والأنشطة الحزبية والتنسيق مع الأعضاء" وشدد على ان الحزب عندو مجموعة من القيادات والشباب والنساء اللي متواجدين واللي كيمثلوا أحسن تمثيل الحزب في جميع المواقع، وخاصة في الإعلام. الأهم نشوفو شحال قدمنا ديال الوجوه الجديدة، وشحال عطينا الكلمة لناس ما كانوش كيتسمعو من قبل.
كما عاد اخنوش فحوارو مع "كود" الى استهدافو طيلة 5 سنوات واعتبر انو توظفات "أساليب ماشي ديال ولاد الناس، اللي ما يمكنش تصورها توظفات باش نوقفو هاد الدينامية، وضرب تحت الحزام على مدار السنة" غير انو اضاف فحوارو الحصري مع "كود" ان "فئات عريضة من المواطنين تاقت فينا، والتحقات بهاد المشروع، ملي البرنامج ديالك كيوصل للمواطن" وبرر هاد الشي بالشفافية اللي اتبعها الحزب "كنا شفافين من الأول، وكنقولو هو اللي كنديرو. ماعمرنا خبينا شي حاجة على المغاربة"
كما برر زعيم لحمامة اختيارو للترشح للانتخابات البلدية فمدينتو اكادير عوض الانتخابات التشريعية وبرر هاد الشي بالارتباط لكبير اللي عندو مع هاد المدينة "سواء على المستوى الشخصي أو السياسي. أنا ولد المدينة، وعائلتي من المنطقة، وفيها تحملت مسؤولية رئاسة الجهة" واكد فحوارو مع "كود" اللي غادي تنشر لاحقا٬ انو اختار "الترافع على المدينة من الميدان"
هدر فالحوار كذلك على توقعاتو ففوز فانتخابات 8 شتنبر التشريعية ثم البلدية وعلى مغربو لما بعد هاد التاريخ..
الحوار يتنشر لاحقا