كيفاش عاشو لعابة المنتخب الانقلاب العسكري فكوناكري. وحيد: كان يوم غريب بدا بالقرطاس ولكرد: عشنا الرعب – فيديو

المغرب كان من المفروض يلعب اليوم ضد غينيا فالجولة الثانية من فمباريات مجموعته المؤدية لمونديال قطر. طبعا بعد الانقلاب كلشي تأجل وكلشي تخلع على اللعابة اللي كانو فلوطيل.
حتى الفيديوات اللي تسربو كتأكد حالة الخوف هادي. عسكري دخل للوطيل اللي فيه اللعابة وبدا يطلق فالقرطاس. باش كان خارج الكار اللي فيه اللعابة من لوطيل وغادي للمطار٬ كانو الناس بزاف فالشارع. اكيد اللعابة كلشي تخلط ليهم فراسهم. كانت الفوضى. ممكن اي حاجة توقع فديك الفترة.
مدرب الاسود وحيد خليلوفيتش قال فتصريح بعد وصول اللعابة للمغرب انه عاش نهار غريب واضاف "فالصباح فقنا على طرطاق البارود. كان بزاف" واوضح ان هاد الجو خلى اللعابة يخافو "طبيعي اللعابة فهاد المرحلة دخلو لمرحلة القلق. بداو كيسولو اش غادي يقدر يوقع".
كما اضاف ان هاد الجو المشحون غادي يتخفف مع مرور الوقت. قبل ما يعرفو باللي كاينة طيارة غادية توصلهم للمغرب بعد تأجيل الماتش. طيارة تكلف شخصيا الملك محمد السادس باش تدخل وتخرج من هاد لبلاد.
اللاعب نايف لكرد هدر على "الخلعة اللي عاشوها لعابة المنتخب. "كانت لحظات صعيبة بزاف. تخلعنا واخا كان الامن فلوطيل".
فيما شكر الياس شعير لمغاربة اللي دعمو اللعابة وساندوهم فديك اللحظات الصعيبة. نفس الشيء قالو ياسين بونو "كنشكرو كاع الشعب المغربي اللي سول فينا وتخلع علينا حتى وصلنا بخير".
بونو كيتمنى هاد اللحظات تولي من الماضي "نتمناو نرتاحو ونحاولو نوجدو هاد الماتش ايلى كان مبرمج قريب".