كيهضر على معاناة المغربيات بسبب الاحكام المسبقة.. فيلم "ايادي ناعمة" لي البطلة ديالوا جميلة الهوني غادي يشارك فالمسابقة الرسيمة لافلام الاندية السينمائية

الفيلم القصير "ايادي ناعمة" للمخرج فيصل الحليمي قدر يكون ضمن المسابقة الرسمية لافلام الأندية السينمائية في الدورة 11 ديالها، لي كنتظمها الجامعة السينمائية من نهار 20 الى 24 اكتوبر من هاد العام في كازا والمحمدية.
الفيلم كيهضر على المعاناة ديال المراة المغربية بسبب الاحكام المسبقة، بحيث الاحداث كدور على واحد الشاب فأواخر العشرينات كيعيش مع امراة عندها ربعين عام وديما مناقشين. حتى غادي يولي الشاب كيطيع مراتو والأوامر ديالها، ولكن غادي يجي واحد النهار ويوقع بيناتهم مشكل، وحياتهم غتقلب واخا الحب لي كيجمعهم.
الهدف من الفيلم هو تسليط الضوء على المرا المغربية والاضطرابات لي كتعيشها من مشاكل نفسية، وهاد الدور غادي تشخصوا الممثلة جميلة الهوني وهي البطلة ديال الفيلم. الفيلم من كتابة لمياء الخلوفي وإنتاج شركة "uranos prod"، وتصور كامل في طنجة، وغادي يتعرض فمهرجانات دولية.