شتي كون كان مثلا الوافا الله يرحمو وزير الصحة يديك تضرب الشوكة في قاعك ونتا ضاحك وناشط وغير بحلاوة اللسان، أما بحال أيت الطالب وطريقة التواصل ديالو واخا يكون عندو إكسير الحياة تدير مناقص غير بكيفاش غادي يعرضو عليك

من نهار بدا هادشي ديال جواز اللقاح عمرو طلبو ليا شي حد، صدق بحالو بحال الكمامة في فاس كنسمعو بيهم ولكن مكنشوفوهمش، مشيت لإدارة وبانكة والأسواق الكبرى والمول والحمام مكاينش لي يسولك فشي جواز ولا زواج، لدرجة بديت كنتسائل علاش هاد الناس خارجين أصلا ضد هاد جواز التلقيح لي مكيسول فيه تاواحد، على أساس السرباي ديال القهوة خاصو يولي يخدم سرباي وبوليسي وقايد ومقدم وطبيب غير باش يدوز سربيسو على خير، عوض يسربي الناس يبقى مقابلهم أرى جواز ديالك يتحقق منو واش هو هاداك، حيت راه كاع ملي تلاقى شي حد مطبق القانون كتجبد غير التيليفون وتوريه وهو كاع مكيتحقق بتيليفونو يعني توريه حتى الباس ديال جدك تدوز، ولكن ملي تشوف الإحتجاجات لي دارو المغاربة تقول راه الحياة ممنوعة عليهم بلا جواز اللقاح، طبعا تقدر الأمور تكون متشددة في شي بلايص في الرباط وكازا ولكن عموما راه ممسول فيه حد مكيطلبو حد بالنسبة للناس لي مخدامينش في الإدارات هاديك هدرة خرى.
في المظاهرات ديال عشرين فبراير كان واحد الغياب كبير للعيالات والأمهات بالخصوص، من غير ديال العدل والإحسان واليساريين أو حتى دوك لي عندهم مع السياسة، في الغالب العيالات العاديين الأمهات الاستاذات الموظفات الفرمليات العيالات المغربيات مكانوش كيهبطو في عشرين فبراير، كان أغلبية الحضور رجال كل خروجه لما خرج إليه، فاش كنت أنا نيت كنكون غادي لشي مظاهرة كتبقى الواليدة واقفة في الباب تدعي عليا بالسخط والفشل وتدعي مع الملك بحال الى خارجين نديرو إنقلاب، وداك الهدرة ديال واش بغيتو نوليو بحال سوريا، دابا في المظاهرات كنشوف عيالات بحالها خارجين خوفا على راسهم وعلى ولادهم، وجايبين معلوماتهم الطبية من الواتساب وكروبات فايسبوك الغارقين إشاعات، ماخارجينش على ود السياسة ولا مطالب إجتماعية، خارجين غير باش ولادهم مايديروش التلقيح وتجيهم السخانة شي يوماين، وراسهم عامر بالألاف المؤلفة ديال الحالات لي تشللو وماتو بسباب اللقاح.
من غير الإشاعات والمعلومات الكاذبة والغباء البشري والقراية كثر من لقياس لي محركين هاد الإحتجاجات ضد التلقيح، فراه حتى أيت الطالب كيلعب دور مهم فتأجيج هاد الإحتجاجات بسباب شخصيتو الغير ديبلوماسية أو تواصلية مع المغاربة، كاين لي كاع مكيعرفو واش هو وزير الصحة وكاين لي كيعرفو ولكن بلا مايكون عندو أثر أو موقف منو، هادشي من غير الإطلاع على الكوارث ديال وزارة الصحة والصفقات لي تدارت والفلوس لي ضاعت ولي ديما كيكتب عليها موقع كود بلا حتى شي جواب من وزارة الصحة، شتي كون كان مثلا الوافا الله يرحمو وزير الصحة يديك تضرب الشوكة في قاعك ونتا ضاحك وناشط ويفهمك علاش وكيفاش غير بالعقل، أما بحال أيت الطالب وطريقة التواصل ديالو كتخلي الواحد بصح يتيق بلي كاينة مؤامرة من طرف وزارة الصحة ضد المغاربة حسب مايروجه هادوك لي ضد التلقيح.