واش غير هادر كيف ديما؟ ولا ما فراسوش وزير ومازال كيدير حملة انتخابية.. وهبي: كنوجد ملتمس نقدمو للملك خاص بالعفو على "معتقلي الريف"

عبد اللطيف وهبي وزير العدل كيوجد ملتمس يقدمو للملك للعفو على "معتقلي الريف". هذا ما أكده وزير العدل، خلال حلوله مساء أمس الأربعاء ضيفا على برنامج "حديث مع الصحافة"، مشيرا إلى عمله على هذه الخطوة، "وتبقى لجلالته كامل الصلاحيات لاتخاذ القرار الذي يراه مناسبا".
دابا واش غير كيهدر كيف ديما. معروف على السي وهبي الشفاوي والانشاء. ما غاديش نكون فالحكومة ودخل. ما غاديش نقبل على راسي شي واحد يكون رئيس علي. وقبلها. دابا كيقول باللي كيوجد ملتمس. باش كتوجد هاد الملتمس يا السي لوزير. وجدو. راه فساعات كيوجد ماشي اشهر. راه غير كتبة. اما الاجراءات ديال التقديم والظروف السياسية ووو فهاديك عملية اخرى خاصك تكون ضابطها قبل ما تهدر.
كنتي توجدو وتقول راني وجدتو ورسلتو. هادا هو الخبر. ماشي غادي نوجد. راك وزير دابا ماشي فحملة انتخابية طالقها وعود.
وهبي قال فدوزيم باللي، "موضوع معتقلي الريف، وصلنا فيه درجة حكم نهائي بمحكمة النقض، وبقي اختصاص العفو الذي هو اختصاص جلالة الملك، الاَن أنا أهيئ لكي أقدم ملتمسا لجلالته للعفو عنهم، ويبقى لجلالة الملك الذي هو رئيس الدولة كامل الصلاحية لاتخاذ القرار الذي يراه مناسبا، وهذا إجراء أتداول فيه مع السادة الوزراء والسادة الموظفين، لأنه لدي رغبة في الإفراج عن معتقلي الريف".
وزاد موضحا "هذا الملف لم أشتغل عليه بغرض سياسي، بل لأنه لدي قناعة أنه يجب أن يكون هناك تجاوز في عدد من الملفات لخلق جو جديد، ونستمر في النهج الذي سار عليه جلالة الملك مع هيئة الإنصاف والمصالحة، لذلك أنا أتحمل مسؤوليتي وسأستمر في ذلك".
نتمناو يكون انفراج. راه لجنة بنموسى كانت رفعاتو للملك وطلبات هاد الشي. ما معروفش الدوافع ديال هاد الهدرة وغير هدرة بلا فعل. على الأقل لجنة بنموسى دارت الفعل وبقات ساكتة.