المهدي بنسعيد راك وزير وخاص تسمع أكثر ما تدوي وتكون عارف الفرق بين مجلس وزاري ومجلس حكومي

هاد الصباح كان محمد المهدي بنسعيد، وزير الشباب والثقافة والتواصل، ضيف عند "مومو" في إذاعة "هيت راديو"، باش يدير السيراج للمنصب ديالو، ودار زلكَة يغرق فيها فيل ملي ما فرقش بين مجلس وزاري ومجلس حكومي.
"مومو" اللي كان كيردد أن بنسعيد عندو مجلس وزاري هاد الصباح، لقا تجاوب مع عند الوزير، اللي قال ليه وي بصح، وما صححش المعلومة اللي ترددات مرة وزوج وثلاثة.
الصحافية لمياء بحر الدين تدخلات مرة أولى وقالت ليهم راه مجلس حكومي وما سمعها حد، ودازو دقائق ورجعو تاني لمجلس وزاري اليوم وتدخلات عاوتاني باش على الله يهيد الله الوزير ويعيق، ساعة والو.
الوزير اللي ما يصححش بحال هاد الأخطاء وباغي غير يدوي في الميكرو بلا ما يسمع ممكن أي واحد يزلكَو شي زلكَا خايبة ويوليو تاني في الأزمة والحيحة والشوهة ف "فايسبوك" وغيرو.
ومن غير هادشي ناض بنسعيد قال ليهم أنا علاقتي مع كل الوزارات لأني وزير الشباب، أييه الناس يخدمو ويديرو برامج وجي أنت قول ليهم صبعي تما.. وكيف كيقول المثل المغربي: خدم يا التاعس من سعد الناعس.