حسب النيابة العامة المعلم والفقيه لا تيقو فيهم على بناتكم القاصرات هوما لي كيتزوجوا بيهم بزاف.. طبعا الزواج ماشي خطر يحضي منو الواحد، ولكن الزواج بقاصر يمكن نعتابروه خطر وآفة مادام أنها فاقدة للأهلية القانونية

حسب النيابة العامة المعلم والفقيه لا تيقو فيه على بناتكم القاصرات هوما لي كيتزوجوا بيهم بزاف، طبعا الزواج ماشي خطر يحضي منو الواحد، ولكن الزواج بقاصر يمكن نعتابروه خطر مادام أنها فاقدة للأهلية القانونية، وحتى القضاء المغربي عطا لقاصرة كانت متهمة بالخيانة الزوجية لأنها قاصرة تم التغرير بها وهتك عرضها، يعني القاصرة راه مايمكنش تمارس الجنس بخاطرها كصاحبة ولكن يمكن تمارسوا كزوجة، هاعلاش راه حتى زواج القاصر راه نوع من التغرير، وحدة عندها 16عام، باش غادي تعرف شنو صالح ليها في الحياة، وواش عندها الأهلية تتاخد قرار مصيري بحال هذا، حيت الزواج القاصر راه ماشي غير الجنس راخه في الغالب فيه الإنقطاع على الدراسة وفيه جوج ولاد أو كثر قبل ماتوصل ل22 عام، وداك الساعة يقدر يوقع الطلاق وكتم راجعة لدارهم بجوج ولاد وهي باقا يالله قالت بسم الله في الحياة، ويجي واحد يبدى يدوي على الحلال زين، والبنت هي تكون في دارها مع راجلها، راه راجلها خفيف ضريف كيهز صاكو ويزيد هي لي كتبقى واحلة بالولاد وتدور في المحاكم باش يحكمو ليها بالنفقة ديال 350 درهم للشهر، وهادشي الى عطاها ليها، شحال من واحد كتبقى تجمع عليه وكيمشي يدوزها شهر دالحبس ويخرج، والمرة والولاد يشدو في البولة ديال مية.
البنت في بزاف ديال البوادي بحال شيم ونتيف كيصيرو عليه فابور، خاصهم غير فوقاش يتفكو منها، اللول لي يجي يخطبها يعطيوهاليه، وهاهوما تهناو من فم كان كياكل غير الدقيق، علما أن البنت في البادية راه كتضرب تمارة ديال بصح وكتعاون في الشقا ديال الدار، وكتدير لي كيدير الدري وكثر بعد المرات، ولكن مع داكشي ديال الشرف والعار وحضي معاها ماتصاحبش وحيد ليها التيليفون وحتى من ناحية الأخطار المحدقة بها، مايمكنش ليها تمشي تسرح بعيد خصوصا الى كانت تامرة وزينة واخا راه السرح ماكيزكلوش الدحشات مابقى غير البنت، واحد السيد من الدوار عندنا كان والد شي ستة البنات، ودوك البنات حارات وزينات وكيديرو كولشي يسرحو يسقيو من البير بالدلو والرشا، أي حاجة يديروا لدراري يديروها هوما، ومع ذلك كنت نسمع الناس كيهدرو عليه بواحد الشفقة بحال الى فيه شي مرض معندو دوا، وافلان مسكين عطاه الله غير البنات، وفلان مسكين مكاينش لي يعاونوا عندو غير البنات، عاد مشكل الورث وهاداك كارثي كثر، لي والد البنات كيموت يخلي ليهم دار يجي يقسمها معاهم عمهم أو شي ولد عمهم ماخاصو حتى خير ويجي حتى هو باقي حق باه في خوه.
ها العقلية في البوادي كتحرم البنات أولا من القراية، والبنات ديال البادية راه قرايات وصبارات راه كيعيشو فدوك الداخليات راه عكاشة حسن منهم، كاين لي معندهمش حتى لما سخون للدوش والإدارة يسرقو ليهم ماكلتهم وحقوقهم، ومع ذلك كيقراو ويتوظفو وينفعو واليديهم هادوك لي كيكونوا عندهم أباء وأمهات متنورين شوية ومآمنين بلي القراية راه هي الخلاص من عيشة التكرفيص لي عايشينها، وكاين طبعا العقليات ديال فك عليا، بحال الى عندو الديشي دالسلعة باغي غير يتهنى منو، هادوك لي كيلقاو فيهم المعلمين والفقهى مرادهم، فين ما شي فقيه زوفري شارط فشي دوار كيتزوج بقاصرة تصبن ليه وتطيب ليه، وكذلك المعلم حسب النيابة العامة، المعلم والفقيه لي يشوف في بنت طفلة باقي قاصر مرأة صالحة للزواج راه فيه شي خلل أو على الأقل مستغل جبار أناني حكار.