النصب باسم الدين: باغي دير لاباس فمدة قياسية و بلا ماتخلص لا ضريبة لا والو؟ توكل على الله و سمي راسك الراقي أبو بعرور المغربي ! ودير خدمة الطبيب و الفارمسيان بلا خبار وزارة الصحة

بغيتي دير لاباس؟ ماتخلص لا ضريبة لا والو ؟ تولي تانتا بالكاط كاط و الفيلا ؟ تدور بيك العيالات ها الطويلة ها القصيرة ها السمرا ها الشهبة ؟ و يكون عندك سلطة على دوك العيالات كاملين ؟ تقدر تعبز ليهم فبزازلهم كي بغيتي و تلمس ليهم فتراميهم كي تشهيتي و تمشي بعيد گاع.
. ؟ بغيتي تولي مشهور؟ عندك سلطة و معارف ؟
ماغانقولكش الجواب ديال عادل إمام "اتكل على الله و اشتغل رقاصة"
غانقولك اتكل على الله و اشتغل "راقي"
و باش تخدم "راقي" طول اللحية و دير باج فالفايسبوك و سمي راسك الراقي المغربي أبو بعرور البعروري !
آآه ويي! ماعمري ماعرفت بلي الجنسية المغربية تقدر تلعب الدور ديال شهادة إيزو للجودة حتى شفت البروفيلات ديال الرقاة ماكاين غي الراقي المغربي أبو فلان الفلاني ! الراقي المغربي أبو فرتلان الفرتلاني ! مهنة جديدة بانت بلا خبار المخزن ! بلا خبار مديرية الضرائب ! بلا خبار وزارة الصحة ! عا تا جا ! مهنة ماليها عوالين على داك اللقب ديال مغربي باش الصيت ديالهم يوصل لإخوانا فدول الخليج و يوليو يتخلصو بالاضافة للدرهم المغربي بالدرهم الاماراتي و الريال السعودي و البيسة العمانية،عندهم مراكز كبيرة مديكوريا مزيان ! مصبوغة بالزرق و لا بالخضر !! و مكاتب مرتاحة فيها فوطويات للانتظار محطوطين فيهم لي كارط فيزيت ديال الشيخ الراقي أبو بعرور.
مشا داك الزمان ديال" الفقيه" جالس فوق هيضورة و مدور بيه المجامر و العيالات ضايرين بيه الضومين ديال الدجل تطور الحمد لله، دابا الراقي عندو مكتب عازل الصوت فين يبان المكتب ديال مريم بن صالح الرئيسة ديال الباطرونا تاهوا بالبيسي قدامو و بالميكروفون و كايصور الجلسات ديالو مع شي جنون كايهضرو بالدارجة ديال ولاد البرنوصي لايف و كايبارطاجيها فالفايسبوك و قبل ماتسالي الفيديو كاينصحك تبارطاجيه مع صحابك باش السحارة و الجنون يتفرشو و كايجي الهبيل ولد الهبيلة يبارطاجي الفيديو و يدير الاشهار للراقي، حتى المرا دابا لي كانت كاتمشي عند الفقيه و حشمانة تقولك " كنت عند الفقيه" حيت غاتسمى كادير الشعودة ! ولات تاتخرج فيك عينيها و تقولك "مشيت عند الراقي أبو زعبول" بوجها حمر ! حيت سميتو راقي و داير لحية و مسمي راسو ابو زعبول راه راجل دياني كايعالج غا بالقرآن مشيييكييين.
مهنة باش تمارسها مامحتاج لحتى شي ديبلوم و لا شي دراسة و لا شي شهادة ! واخا الخطورة ديالها على الصحة النفسية و الجسدية ديال المواطنين غي زيد دخل بسباطك مرحبا بيك. خاصك غا شي صنطيحة عرييييييضة ! تكون فيها جوج ميترو و شي عينين مطرطقين كاتعرف تخرجهم باراكة عليك ! هادوك هوما الديبلوماتك و شواهدك و السيفي ديالك.
مهنة ماعندها حتى شي قانون كاينظمها ! حتى شي إطار قانوني ! المخير فيهم مخبي مورا ظهير 1960 لي كايأطر الخدمة ديال العشابة باش يدير الرقية ، و الحجامة و يخلط العشوب و يبيعهم للناس على أساس أنهم "دوا" ولا "خلطات سحرية " في حين أنه ممنوع على أي واحد من غير الصيدلي يخلط شي مركبات و يبيعهم على أساس أنهم دوا !
وا سير نتا جيب الباك بمونسيو وقرا واحد سبعسنين ديال الطب مورا الباك و دير التخصص فطب النفس و دوز السطاجات وجيب الديبلوم من جامعة محمد الخامس و لا جامعة مونبولي و حفي عينيك بالقراية و يجي واحد لابس جليليبة و مربي لحية يشد تاهوا عيادة حدا العيادة ديالك و تاهوا عندو باياص فحال الباياص ديالك و يعلق بلاكة فالبرنوصي و لا التشارك و لا الرحمة فوق البلاكة ديال العيادة ديالك مكتوب فيها الراقي المغربي أبو بعرور علاج جميع انواع الأمراض: المس و السحر و التوكال و الجن العاشق مع هاد الجن العاشق ولا موضة عند شي مغربيات فينما كاينة شي هبيلة بنت الهبيلة تعطلات فالجواج و لا تعكسات ليها شي خطوبة راه فيها الجن العاشق لي واخا القدرة لي عطاه الله باش يطير من بلاد لبلاد فثواني خلا السويسريات و النگليزيات و الطاليانيات ! خلا شارابوفا و خلا گوينيث بالترو و خلا هيفاء وهبي كايتساراو عريانات بالسترينگات فنيويورك و لندن و بيروت و جا يسكن فنويعيمة و لا خديديج فحد السوالم باش تخلا دار بوه فاللخر من طرف الراقي أبو بعرور فشي گاراچ‌ فحي التشارك فكازا!
خلص نتا آ المعلم و الاستاذ و الطبيب الضريبة على الدخل و لا سينسيس و ساهم فصندوق التقاعد و ساهم فلامو و يجي الراقي المغربي أبو بعرور يتخلص 150 ولا 200 درهم على الحصة ماتدي معاه الدولة فيها تا ريال ! يعني لاكان كايخدم مع عشرين زبون فالنهار ! و كاياخد نهار ديال العطلة كل سيمانة راه كايدخل واحد 10 ديال البريكات على الأقل فالشهر، ايه نعام آ سي 10 ديال المليون د السنتيم صافية ! بلا خبار الضرائب ! كاتمشي كلها فجيب الراقي !
استغلال بشع للناس باسم الدين و باسم اللحية و باسم قال الله و قال الرسول.
و علاش هادشي ؟
حيت كاين عرام ديال الناس لي مراض نفسيا و لا عضويا كايخليهم اليأس و الجهل يتعلقو بأي بصيص أمل و كايطيحو فهاد المشعوذين و الدجالين لي كايكوميرسياليزيو ليهم العلاج باسم الدين و كاينصبو عليهم، خصوصا بلي مازال بزاف ديال الناس فاش كايسمعو فلان مشا عند طبيب نفسي كايشوفو فيه الشوفة ديال حمق و لكن لامشا عند راقي راه هانية ! عادية ! غي غايقرا عليه شوية ديال القرآن و صافي…
واش الدولة غاتبقا ساكتة على هاد الفوضى حيت معاونينها هاد الرقاة و مهنينها من المرضى لي غايزيدو يعمرو ليها السبيطارات؟
مايمكنش ! هذا ماشي حل! راه صحة المواطنين عندها واحد الثمن كاتخلصو الدولة فاللخر، تعيا ماتسلت و مادير عين ميكة و الله و ماتعالج داك المواطن و شد صحتو لا تحرك و خدم و قرا و كان مواطن كايساهم فالعجلة الاقتصادية ديال البلاد.
الدولة خاصها تحمل مسؤوليتها و كيما دارت حملة ديال تحرير الملك العام خاص شي حملة ديال تحرير صحة المواطن من هاد النصابة 2.0 لي باغين يديرو خدمة الطبيب
وخدمة الفقيه و خدمة الفارماسيان بلا موجيب الشرع. ولا الطروطوار احسن من صحة المواطن؟