كيفاش يتعفى عميد كلية سطات بلا ما يتحاسب.. خاصو يتحاكم على فضايح الاساتذة

اليوم تسلم نجيب الحجيوي من منصب عميد كلية العلوم القانونية والسياسية لسطات جامعة الحسن الاول بسطات مرسوم اعفاؤو اللي كان صدر فالجريدة الرسمية من قبل رئيس الحكومة عزيز اخنوش.
فالمرسوم اشارة الى ان مرسوم الاعفاء جا بناء على "طلب المعني بالامر بتاريخ 26 نونبر 2021′′ وعلى رسالة وزير التعليم العالي والبحث العلمي والابتكار المروفعة الى رئيس الحكومة بتاريخ 30 نونبر 2021".
هاد الفيلم كولو داير على الجنس مقابل النقط اللي تفجرات فهاد الكلية. فيها اساتذة متابعين بالاتجار بالبشر وتهم كثيرة خايبة.
دابا كيفاش اساتذة ماشي غير استغلو طالبات جنسيا بل زورو نقاط ودارو لفضايح فامور عندها علاقة بسير الكلية يعني عمل عميد الكلية بلا ما يتم لا محاسبتو لا والو. الاعفاء راه ضد ربط المسؤولية بالمحاسبة.
خاص القضية تمشي بعيد. وزارة التعليم العالي خاصها تابع هاد العميد وطالب بالمحاكمة ديالو. القضاء بوحدو غادي يحدد مسؤوليتو. واش بريئ ولا كان على معرفة بهاد لفضايح.
وزير التعليم العالي مسؤول علي هاد لفضايح. ما خاصوش يغطي عليه. راه استاذ جامعي ودوز العمادة كيعرف كلشي. راه عبث تخليوه يمشي بلى والو