بيان العار ضد دولة الحق والقانون لوزارة الخارجية ضد سفير المغرب السابق فمدغشقر. كيفاش الديبلوماسي اللي كانو باغيينو سلطات هاد البلاد يتم التشهير به علانية وقبل ما يدار التحقيق وبالتزامن مع زيارة محمد السادس

كيفاش وزارة بعقلها كيسيروها ناس عندهم شوية العقل وكيفكرو. طبعا هاشي اللي فالصورة ترتبك هاد الخطأ لكبير بزاف. بيان وزارة الخارجية والتعاون ضد سفير المغرب السابق في مدغشقر محمد عمار حكم قبل التحقيق وقبل المحاكمة على ديبلوماسي. بناوه على قالو لي قلت ليهم. كيفاش "مصادر متقاطعة". واش بعقلكم. راكم كضربو الديبلوماسيين كلهم وكتعريو دولة الحق والقانون. ما كاينش مصادر متقاطعة يا عباد الله كاين تحقيق وبعدو القضاء.
وزارة الخارجية كتقول باللي رسلات البارح الاثنين بعثة للتفتيش، إلى سفارة المغرب بأنتاناناريفو في أعقاب معلومات تم استقاؤها من مصادر "متقاطعة"، حول سلوكات السفير السابق في مدغشقر". كيفاش كتحكمو على سلوكاته وانتوما يالله راسلين بعثة.
البيان وجه اتهامات خطيرة للغاية لهاد السفير. كالو عليه وشوهو عراضو باللي معطيات عندهم على "أن السفير السابق في مدغشقر قد يكون قام، على الخصوص، باختلاسات مالية، بمناسبة تنظيم عمليات إنسانية لفائدة الشعب الملغاشي".
وكالوا باللي كان يقوم "بأعمال تتعلق بالتدخل في الشؤون الداخلية للبلاد، في خرق للقواعد الدبلوماسية، وفي تعارض مع التقاليد الدبلوماسية المغربية المترسخة".
واتهموه كذلك بالقيام ب"بسلوكات تمييزية تجاه الطوائف غير المسلمة في البلاد، دون احترام للتنوع العرقي والديني لمدغشقر، ولا لقيم الانفتاح والتسامح التي تدعو لها الديانة الإسلامية ويكرسها أمير المؤمنين صاحب الجلالة الملك محمد السادس، نصره الله".
وهاد الشي راه مدمر وكلو غير اتهامات. اش هاد الانفعالية الخايبة اللي كتضربو بها السفراء. كيفاش تحكمو عليه وعلقو راسو ويعرفوها كاع لمغاربة. ايلى غدا توصل التحقيق باللي هاد السفير ما اختلس ما دارش تميير طائفي ما دخلتش فشؤون مدغشقر كيفاش تعوضوه واش يقدر يتعوض بعد هاد التشهير.
تسيير الوزارة او لبلاد ما خاصوش الانفعالية خاصو يطبق فيه القانون. السيد برىء يتسناو حتى يسالي التحقيق ولكن باش يكون بيان رسمي راه ضد دولة الحق والقانون
للتذكير فهاد السفير اللي دوز اكثر من 8 سنين تماك وكلشي كيعرف باللي السفير باش يفوت 4 سنين راه الدولة اللي كتبغيه يبقى٬ كيفاش كان مزيان وولى يدخل فشؤون لبلاد وفين المصالح الاخرى. راه كاين الجيش وكاين لادجيد كلهم فالسفارة علاش ما كالو والو هاد السنوات كلها ولا كانوا قالو علاش ما تم اتخاذ حتى قرار حتى زار الملك محمد السادس هاد الدولة. والفضيحة لكبيرة ان ريوس الخارجية صلاح الدين مزوار وناصر بوريطة هما اللي كتبو هاد الاتهامات اللي خاصهم يتحاكمو عليها قبل اصدار حكم على شخص بدون محاكمة