وهادي فضيحة وخاصها اقالة وزير الصحة.. كيفاش اللجنة العلمية مامثيقاش أكذوبة اميكرون المغربي ومفراسهاش المعطيات العلمية وعلاش ايت الطالب باغي السدان بأي طريقة

اجيو تعرفو الحقيقة يا المغاربة كيفاش كيستخف بكم خالد ايت الطالب وزير الصحة والحماية الاجتماعية، على اضحوكة اميكرون المغرب اللي تولد فكازا.
أعضاء فاللجنة العلمية مفراسهمش هاد العجب ومامتفقينش مع هاد التخربيق ومقدروش يثيقو بلي اميكرون تنشأ المغرب.
ايت الطالب كيقلب على الاغلاق وصافي وديما كيدافع عليه، حسب مصادر "گود"، هاد الوزير كيقول انا بوحدي مضوي البلاد انا لي عارف ومنتشاورش مع حد.
هاد الوزير مكيسمعش لحد، ومكاينش لي ينصحو فالديوان ديالو، كيدير لي فراسو، حسب مصادر بالوزارة.
مصادر فاللجنة العلمية قالت ل"گود" :"ميمكنش يكون المنشأ ديال اوميكرون جوج دول..وصعيب علميا تثبتها وخاص ابحاث ومعطيات دقيقة".
الوزير كيخربق فهادشي وقولب اللجنة العلمية وصنع تخربيقة ديال اميكرون المغربي غير باش يلقا سبة للسدان لي كيدافع عليه ديما.
من الناحية العلمية ياش ينتقلو من 10 طفرة إلى 32 طفرة فالفيروس فالمغرب، خصو وقت وأبحاث باش نعرفو كيفاش وعلاش. ماشي غير اجي وقول كيف دار الوزير مع حالة مصابة بالمتحور اميكرون.
الحل كولشي عارفو هو الجرعة الثالثة خاص ناس ديرها، هاد الجرعة ممكن يديرها اي شخص واخا يكون فاتو الأجل ديال 6 اشهر مور الجرعة الثانية، بحيث يكفي غير يديرها الشخص غادي تقوا المناعة ديالو 10 مرات مور 48 ساعة.
لي فشل وزير الصحة هو التواصل، هو يقنع المغاربة يمشيو يديرو الجرعة المعززة، والحل ماشي السدان، الحل هو تقنع المغاربة يديرو الجرعة المعززة ويسالي هاد الفيلم.
بريطانيا لي كتسجل اعلى معدل اصابات، راها حالا كولشي خلات بنادم يعيش يتحرك، ولكن في نفس الوقت ناس كتمشي دير الجرعة المعززة وتحترم الإجراءات الاحترازية.. واش ايت الطالب حسن مسؤولي الصحة فبريطانيا؟ اكيد لا، اوا خصو غير يتبعهم ويتبع الخطة فاش ماشيين.