فضيحة فلوطيلات اللي دارت الدولة فابور للمغاربة اللي دخلو من الخاريج وغادية لخلق بؤر. كياكلو مجموعين وصحاب لوطيلات دايرين ليهم البيفي والنتيجة 9 فيهم كورونا غير فاوطيل واحد فكازا

السلطات رجعات لمغاربة اللي حاصلين من تركيا والامارات والبرتغال. تعطلات فالحقيقة باش ترجعهم ولكن تدبير هاد الرجوع كان فيه هفوات كثيرة. اولها ان الدولة تتحمل نفقات لوطيلات طيلة 7 ليالي. هادي كان خاصها يتحملوها المواطنين ماشي الدولة.
ثانيا طريقة تدبير لوطيلات. هادي كارثة. وفق شهادات حصلت عليها "كود" من اول الطيارات اللي وصلات الخميس فالليل٬ كانت الظروف ماشي باش تحاصر الفيروس بل باش يتكاثر. لا تباعد لا احترام للاجراءات الاحترازية لا وعي عند عينة من اللي رجعو من تركيا.
وفق مصدر من مستشفى مولاي يوسف فكازا ل"كود" فنهاية الاسبوع جاوهم 9 حالات غير من اوطيل واحد حدا كازا بور. هادو كلهم طلعات فيهم كورونا. هادو كانو كيتخالطو مع كلشي.
وفق نفس المصدر ل"كود" فكاينين اللي ما دايرينش حتى الماسك فلوطيل. مسؤولية هاد لوطيل كبيرة بزاف. شافت الدولة مخلصة وطلقات كلشي.
اليوم يتوقع باش تتغير طريقة التعامل ديالهم مع اللي جابهم الدولة يديرو "لاكارانتين" 7 ايام. قبل هاد الشي غادي يعاودو ليهم تيست بي سي ار" اليوم الاثنين ويزيدو اخر نهار لاربعا واللي لقاوه "سلبي" يمشي لدارو.
لكن راه الطريقة المتبعة فشي اوطيلات كيخلقو بؤر جديدة لكورونا. خاص هاد الشي يتغير اليوم