شكون يحاسب بوريطة ووزارتو وعلاش ما دارش لجنة تقصي الحقائق. عذب مغاربة حصلو برا وعوض يدير تيست ب300 درهم جابوهم فطيارة فابور وداوهم لاوطيلات

شكون يحاسب ناصر بوريطة وزير الخارجية والتعاون اللي فالوقت اللي لمغاربة كيموتو برا خرج فيديو مخلص عليه باش يقولو ليه هو اللي حرر المغرب وجاب العز بخصوص ترسيم الحدود البحرية. الفيديو باين اللي دارو وهي صفقة ما قالتش لينا الخارجية كيفاش تعطات وعلاش كتمجد فبوريطة فهاد الوقت. كنعرفو ان السياسة الخارجية ماشي شأن بوريطة. هو دورو بسيط وصافي.
المحاسبة ماشي على هاد الشي. المحاسبة على تدبير ملف لمغاربة اللي حصلو برا. من البداية حتى اليوم. المحاسبة اولا على لفلوس اللي تخسرو. كيفاش تخسرو وعلاش. الخارجية خلصات اوطيلات شي 80 يوم لعدد من لمغاربة. البارح جابت 300 من مالقا لمغاربة كاينين فجهة الاندلس. فابور. 3 طيارات. شكون خلص الدولة المغربية من خلال الخارجية. جابوهم لاوطيلات فتطوان. شكون يخلص فالدولة المغربية.
الخارجية كتقول غدا باللي غادي يجيبو من مدريد 300 خراين ف3 طيارات ونهار الاثنين 300 اخرين ف3 طيارات. كلشي على حساب ميزانية الدولة اي لمغاربة. كلهم غاديين يديوهم لتطوان.
بلا ما نهدرو على التكرفيص اللي عاشوه هادوك البارح كيف نقل مسافر فشهادة ل"كود". دارو شي 5 فبيت واحد. شي ما جابوش ليه باليزتو. يعني هاداك التباعد فهموه بالمقلوب. كاين اللي داروه فبيت مع عائلة. بلا ما نهدرو على المعاملة الخايبة يضيف مصدر "كود". اما الويفي باش يتصالو بعائلاتهم فعيان بحال المعاملة اللي عاملوهم بها شي وحدين فالسلطات. باش ناض الاحتجاج گالو ليهم ما كناش معولين علي 300 شخص. كنا معولين غير علي 100. واش كيتفلاو على بنادم هادو. شي وحدين داوهم لشي اقامة سياحية تابعة للتجاري وفا. كلشي مرتجل.
دابا اجيو نشوفو شحال طلعو علينا هاد لمغاربة اللي حصلو برا. كاين اللي كراو ليه دار كاين اللي سكن فاوطيل. هاد المدة كلها. كاين اللي كرفص عائلتو وخلص هاد المدة كلها فاوطيل حقاش ما بغاش دار مكرفصة فيها دوش مشترك وطواليط مشتركة.
دابا نشوفو غير اللي خسرات الدولة. غادي يكون كثير. هادو اللي مشاو كلهم كانو يدخلوهم باش تيست ولى موجود. اي قبل رمضان. يديرو ليهم هاد التيست وبعد 9 ايام يعاودوه. غادي يطلع هاد الشي تقريبا فابور على الدولة مقارنة بهاد الشي اللي تخسر لحد الان.
اليوم علاش ديتو هاد الناس لاوطيلات. ديرو ليهم تيست. اللي سلبي يمشي فحالو بعد 9 ايام يرجع يدير تيست ثاني فالمدينة اللي عايش فيها. وسدات مدام. دابا غاديين يصرفو عليهم كثر.
باش يخرج بوريطة البارح ويسرب تصريح ليه للصحافة يقول فيه باللي "تمت مراعاة الحالات الانسانية والأكثر هشاشة في الدفعات الأولى للعالقين مثل المرضى والعالقين بدون موارد والامهات حيث تم نقل عشرة رضع ضمن هذه الرحلات"
راه كيزيد يضحك علي لمغاربة. على هاد الشي كولو خاص البرلمان يدير خدمتو. ماشي غير يجيبو يسولو. اللا. خاص شي لجنة تقصي الحقائق علي هاد التدبير الكارثي. تدبير شوش على مجهودات الدولة فمحاربة تبعات هاد الجايحة. ما يمكنش وزرا ومؤسسات فالدولة خدامة مزيان ووزرا كيشوهو هاد الخدمة بحال كيف دار بوريطة فتدبير ملف مغاربة حصلو برا.
راه فايطاليا وففرانسا وفاسبانيا دعاو حكومات هاد الدول بسباب تدبير هاد الجايحة. حنا باغيين غير نعرفو اش وقع