اوميكرون گلب شقلب اوربا. شي سد كلشي بحال هولندا وشي سد گاع بلايص النشاط شهر وشي فرض على اللي دخل عندو لاكارانتين وشي زاد البي سي ار على الباس ڤاكسينال

اوربا كلها مرونة بهاد المتحور اوميكرون. كلشي كيوجد للسدان. ما كاين لا نويل لا والو او كاين ولكن فظروف ماشي احتفالية. هولندا مثلا سدات كلشي. دارت حجر شامل. رئيس الوزراء مارك روتي گال فمؤتمر صحافي "انا قدامكم الليلة وانا حزين. بلا ما نطول لكلام. غاديين ندير نسد هولندا من غدا". "ما نقدروش نتجنبو الموجة 5 وهاد اوميكرون كيدوز بسرعة. خاصنا ندخلو اليوم قبل غدا".
فبريطانيا مازال ما كاين والو ولكن عمدة لندن صادق خان بين باللي جاية شي حاجة كبيرة. قال باللي كاين "حدث كثير" غادي يكون فلندن ويستلزمو "رد منسق من الأجهزة العامة".
بريطانيا بدات كتحس بالصهد بعد ما درجاتها المانيا فالدول عالية الخطورة. هاد الشي كان البارح السبت. اي ولى الزيار بزاف على النگالزة اللي باغيين يدخلو لالمانيا. هيئة مراقبة الصحة في ألمانيا إن هذا القرار سيدخل حيز التنفيذ اعتبارا من "الأحد عند منتصف الليل".
اللي جا من هاد الدولة خاصو يبقى 15 يوم فلاكارانتين واخا تكون داير التلقيح. المانيا كانت الجمعة صنفات فرانسا والدنمارك بلدين عاليي الخطورة. عليهم نفس الاجراءات الصارمة اللي غادية طبق على البريطانيين.
شي دول دارت اجراءات صارمة بلا سدان. دابا كاينة هدرة على اغلاق الريسطورات والسينمات والمتاحف والمسارح وحتى المدارس كاينة امكانية لاغلاقها. كلشي حتى يناير ويتعاود يتفتح.
فرانسا اللي عندها انتخابات رئاسية العام الجاي حاصلة. رئيسها ايمانويل ماكرون ما قادرش يدير شي قرار يخسرو الانتخابات خاصة مع صعود يمين ديكولي ويمين راديكالي فاستطلاعات الرأي. دابا بدات بشوية بشوية . عمدة باريس قالت باللي غادية تلغى الألعاب النارية والحفلات الموسيقية المقررة فالشانزليزي راس العام.
رئيس الوزراء كان طلب من المجالس البلدية نهار الجمعة يلغيو الحفلات والعروض النارية. موحالش يتسوقو ليه كلهم.
فايرلندا الامور بدات بالتدريج. لا بارات لا ريسطورات من الثمنية الليل. هاد الشي غادي يبقى معمول بيه حتى نهاية يناير. فالدنمارك زادو على هاد الشي المسارح ودور السينما وقاعات الحفلات الموسيقية والباركي والمتاحف. وهاد الاجراءات غادية تبقى شهر.
فسويسرا مسموح فقط اللي داير الفاكسان اللي يدخل لهاد الفضاءات من الاثنين.
كلشي ترون وحتى الباس ڤاكسينال ما بقاش واكل باش تدخل لدول بحال ايرلندا وايطاليا واليونانو البرتغال.