ميسيون تقريبا امبوسيبل. هشام علوي تلاقى رئيس كوبا. واش الاقتصاد يربط مواقف هابانا الداعمة للبوليساريو ولا ارسال دولة العسكر لسفير جديد غادي يصعب مهمة سفيرنا

هشام العلوي تعين سفير للمغرب في كوبا. بدا مهامو وعطى اوراق اعتمادو لرئيس الدولة الكوبية دياس كانسيل. العلوي جاي من الاقتصاد باش يعوض بوغالب اللي جاي من السياسة ومن المدرسة الاتحادية.
تعيين بوغالب كان فمرحلة تدشين علاقات جديدة مع احد اكبر داعمي البوليساريو فالعالم للي هي كوبا. المغرب رسل اتحادي عندو علاقة تاريخية مع هاد النظام من ايام المهدي بنبركة...
دابا هاد المرحلة بالنسبة للمغرب سالات. خاص ندوزو للمعقول للي هو الاقتصاد. رسل هاد التطواني اللي عندو رجل فالقصر باش يحرك هاد العلاقات. سياسة الكرسي الفارغ كانت كارثية للمغرب. شفنا كيفاش رجع فافريقيا وشفنا كيفاش دار فامريكا اللاتينية، دابا وظف نفس السياسة مع دول داعمة للانفصاليين.
فهاد المهمة "شبه مستحيلة" يقدر العلوي يحرك علاقاتو الاقتصادية. خاصو يختارق هاد العالم فكوبا للي مهيمنة عليه الدولة. رئيس الدولة الكوبية باش استقبلو قال باللي باغي يطور ويقوي العلاقات مع المغرب خاصة الاقتصادية والتجارية. هاد الشي علاش رسل ليكم المغرب النيت هاد البروفيل.
واش بصاح هاد التعيين غادي يسجل مرحلة جديدة فالتعاون بين الدولتين" كيف قال رئيسهم دياز كانيل؟ ممكن. غير هو قبل هاد الاستقبال كان استقبال اخر لسفير دولة اخرى وهو سفير الجزائر الجديد فكوبا. الخطاب ديال التلفزيون الرسمي الكوبي هدر علي "علاقات اخوية كبيرة" ودولة "صديقة" واكثر من هادا رئيسهم دعا الرئيس الجزائري تبون باش يزور هاڤانا.
هاد الشي كيعني ان مهمة العلوي صعيبة بزاف بزاف. عندو اعداء ضد بلادو كثار. كاينة البوليساريو بسفارتها تماك وكاين تعاون كبير بزاف معاهم وكاينة الجزائر اللي كتخلص كلشي.