الملياردير عثمان بنجلون كيخرف. دار فالعلمي لانو “باع ساهام” لسانلام حقاش بلاد مانديلا ما كتعتارفش بمغربية الصحرا ونسى باللي هو السبب الرئيسي فالقطيعة مع هاد الدولة بسباب السلاح اللي كان كيشريه من نظام الابارطايد العنصري

اليوم عثمان بنجلون باطرون “فينانس كوم” وفتقديمو لنتائج البنك المغربي للتجارة الخارجية دار واحد التصريح كيبين باللي السيد دخل لمرحلة الخرف. السيد واقعة ليه شي حاجة.
اليوم فكازا جرعة كبيرة للوطنية بانت فهاد السيد اللي نسيبو هو الماريشال امزيان. هاد الماريشال اللي ارتاكب مع الصلبيون اللي كان خدام معاهم مجازر فالريف فمعركة انوال. حارب عبد الكريم الخطابي وشارك فمعركة انوال 1921. نفس الماريشال غادي يشارك فحملة قمعية هاد المرة مع المخزن ضد انتفاضة الريف ف1959.
شفتو الوطنية كيف دايرة. هاد الشي التاريخ. نرجعو اش قال بنجلون.
قال باللي “المغاربة بشكل عام ما عجباتهمش تفويت الصفقة” “لوحدة من اكثر البلدان دعما للبوليساريو”. الملياردير راجل عقلاني. كيعرف باللي ماشي غير جي وحل فمك. شكون قال ليه باللي لمغاربة ما عاجباهمش الصفقة. اولا واش بعدا انت كتخدم لمغاربة على قدم المساواة فهاديك الشركة اللي هداها ليك الحسن الثاني “البنك المغربي للتجارة الخارجية”. اي واحد يشوف شكون هما المدراء فهاد المؤسسة باش يعرف شكون عينة لمغاربة اللي خدامين معاك اولا. وفين عمرك هدرتي باسم لمغاربة وواش عندك بجميع الفئات بعدا شي معرفة.
ندوزو لاهم نقطة هو انو كيرفض يدير البيزنس مع دولة لا تعترف بمغربية الصحراء. اواه علا من كتكذب. عطيني يا الفاهيم شي بلاد كتعتارف بمغربية الصحراء من صحابك اللي فميريكان ودوز على نگالزة اللي عندك معاهم البيزنس وهبط حتى للصين.
ايلى كنتي كتقصد دعم البوليساريو من قبل جنوب افريقيا هادي قصة اخرى. ولكن بلاتي. اولا الدولة المغربية قررات تعين سفير اللي جاه الاعتماد وماشي اي سفير الوزير المنتدب فالخارجية سابقا يوسف العمراني وللي مشى من القصر حيث كان مكلف بمهمة فالديوان الملكي.
ثم رئيس الدولة الملك محمد السادس كان تلاقى فالقمة الاوربية الافريقية بابيدجان مع زوما رئيس جنوب افريقيا وقررو يبدلو العلاقات بيناتهم.
ولكن خلينا من هاد الشي كولشي. اجيو نعاودو للمغاربة كيفاش جنوب افريقيا ولات داعم كبير للبوليساريو. هاد الشي ما جاش من الفراغ. فظل النظام العنصري اللي كانو البيض كيحكمو فيه السود فجنوب افريقيا. المغرب دعم مانديلا بوساطة من الدكتور الخطيب. غير بعد حظر بيع الاسلحة للمغرب فحربو ضد البوليساريو واحد التاجر اسلحة اسمه عثمان بنجلون جاب صفقة منين؟ من جنوب افريقيا. فاشتباكات بين الجيش المغربي والبوليساريو تم اسر عدد من الجنود المغاربة بسلاحهم. البوليساريو خدمات بالقضية مزيان. جمعات السلاح ونهار استقلت جنوب افريقيا دار للحزب الجديد الحاكم =حزب ديال مانديلا= هاديك الاسلحة.
مع مانديلا كان عاطي وعود للمغاربة بعدم الاعتراف بالبوليساريو٬ تسناو حتى مشاو عاد تم الاعتراف بيهم. ولكن راه بنجلون كان عندو دور. اييه كان كيديرها بحساب اخر ولكن عطات هاد النتيجة.
يعني اليوم اللي جاي كيفهم راك انت ساهمتي ببزاف ماشي غير شوية فهاد الشي.