رحلة جوية جديدة دارتها "لارام" للمغاربة فأوكرانيا اللي باغيين يرجعو للبلاد.. ها التفاصيل

علمت "كَود" أن الخطوط الملكية المغربية برمجت رحلة جوية جديدة، بعد يوم غد الأربعاء، من مطار محمد الخامس بالدار البيضاء نحو العاصمة الأوكرانية "كييف" قصد إجلاء المغاربة الراغبين في الدخول إلى أرض الوطن.
ووفق ما كشفت عنه مصادر "كَود"، فإن هاد الرحلة التجارية الجديدة غادي تدوز 5 ساعات، مشيرة إلى أن الثمن اللي دارت "لارام" مناسب وماغاديش يفوت 4750 درهم للتذكرة. يعني هاد الثمن مناسب مقارنة مع رحلات جوية بين المغرب مع دول قريبة لينا جغرافيا.
"لارام" كيف كشفات مصادر "كَود" وفرات طيارة كبيرة لهاد الرحلة باش يرجعو أكثر عدد من الناس اللي بغاو يجيو لبلادهم بسبب الأوضاع الخايبة اللي كاينة حاليا فأوكرانيا بسباب التهديدات الروسية. مصدر "كَود" قال باللي هاد الطيارة من طراز "Dreamliner" ديال "بوينكَ".
هاد الرحلة الجوية التجارية الجديدة جات بعد رحلة استثنائية مبرمجة يوم غد الثلاثاء من العاصمة الأوكرانية "كييف" إلى مطار محمد الخامس فكازا.