اليسار الراديكالي المشارك فحكومة سانشيت هز رايات البوليساريو فمجلسي النواب والشيوخ ووزير الخارجية: كاين اللي راس مالو غير الهدرة وصافي وحنا باغيين نساهمو فحل قضية عندها 46 عام

القرار الاخير للحكومة الاسبانية بدعم الوحدة الترابية للمغرب وبدعم مغربية الصحرا من خلال تأكيدو على ان "الصبليون تعتابر المبادرة المغربية للحكم الذاتي هي الأساس الأكثر جدية وواقعية ومصداقية من أجل تسوية الخلاف" وان بلادو كتعتارف ب"بأهمية قضية الصحراء بالنسبة للمغرب"٬ هاد الشي نوض نقاش كبير بزاف فالصبليون. كاين اللي عارضوه بقوة خاصة اليسار الراديكالي والاحزاب القومية وكاين اللي انتاقد انفراد الحكومة بهاد القرار بحال الحزب الشعبي المعارض.
اليوم استغل نواب فالكونگريسو =مجلس النواب ديالهم= جلسة للاسئلة الشفوية وهزو الراية ديال البوليساريو. رئيسة البرلمان طلبات منهم يحيدو هاد الشي حقاش الرموز السياسية ممنوعين. هادو اللي هزو الرايات نواب عن حزب "بوديموس" اليساري الراديكالي اللي هو عضو فحكومة سانشيت. غير هما واخا ضد قرار رئيس الحكومة الاخير مازال مستمرين فيها. النفاق وصافي.
فمجلس الشيوخ الاسباني هزو شي نواب من نفس الحزب لافتات فيها راية البوليساريو وعبارة "الصحراء حرة" اثناء مثول وزير الخارجية والتعاون خوسي مانويل الباريس. هاد الاخير كرر 5 المرات باللي قرار الحكومة منسجم مع قرارات الامم المتحدة ومع قرارات خداتها دول بحال امريكا والمانيا وفرانسا
رئيس الديبلوماسية الصبليونية كال فهجومو على صحاب بوديموس٬ باللي كاين جوجت الفئات: شي وحدين راس مالهم الهدرة اي لبلابلا وشي =منهم الحزب الاشتراكي "بيسوي= همو ايجاد حل لقضية عمرها 46 عام. حل مقبول من الطرفين
وقال كذلك باللي الموقف الاسباني الجديد سبق وعبر عليه رئيس الحكومة الاسباني الاسبق ثاباتيرو وباللي فالبيان الختامي عقب اجتماع اللجنة العليا الاسبانية المغربية المشتركة ف2012 و2015 كانت فيه اشادة بالحكم الذاتي المقترح من قبل المغرب. انذاك كان في الحكومة الحزب الشعبي من خلال ماريانو راخوي.
كما اكد المسؤول الاسباني ان حكومات سبتة اللي فيها الحزب الشعبي ومليلية اللي فيها مستقلين وكناريا اللي فيها الاشتراكيون٬ كلهم اشادو بقرار الحكومة الاسبانية