"المال مقابل النقط" بسطات.. موظف وطالب غادين يحقق معهم قاضي التحقيق تفصيليا نهار 19 أبريل.. "گود" جابت ليكم تفاصيل حصرية على التحقيقات

نهار 19 من هاد الشهر غادي يرجع الموظف بمصلحة النقط "ابوجي" بكلية العلوم القانونية والسياسية بسطات والطالب السابق الوسيط هشام بومعزة قدام قاضي التحقيق بمحكمة الاستئناف بسطات باش يحقق معهم تفصيليا في ملف "المال مقابل النقط" ولي طيحاتو الفرقة الوطنية للشرطة القضائية بالدار البيضاء اثناء التحقيق.
ووفق مصادر مطلعة ،ان تحريات ميدانية امنية دارت كانت الخلاصات ديالها أنها ضلوع هاد الموظف ولي هو من ذوي الإحتياجات الخاصة ومعه طالب سابق كان كيجيب ليه الفلوس من عند الطلبة سواء "في كاش بليس" ولا في الحساب ديالو في البنك السياحي والعقاري.
واستدعات الفرقة الوطنية في مقرها بشارع ابراهيم الروداني ثلاثة ديال الطلبة لي عطاو الفلوس مقابل يتزورو ليهم النقط ديالهم وبالفعل خذاو نقط اخرى باش نجحو.
وحجزات عناصر الفرقة الوطنية للشرطة القضائية بالدار البيضاء بيانات نقط طلبة واوراق طلبة ومحاضر النقط بحيث تبين ليها التزوير بالملموس.
وداهمات الفرقة الوطنية للشرطة القضائية من بعد منزل الطالب السابق والوسيط هشام بومعزة بمجمع الخير بسطات ورقم سكنه 407 وحجزت 120 بحث مشروع نهاية الدراسة في سلك الاجازة في مختلف المواضيع، و96 رسالة ماستر في مختلف التخصصات و10 اطروحات لنيل شهادة الدكتوراه في مواضيع مختلفة و14 بحث لنهاية التكوين بالمعهد العالي للقضاء، اضافة الى مسودات ومراجع لمواضيع مختلفة ذات الصلة، ثم جوج مذكرات ديال حسابات لدفوعات مالية ديال الطلبة المستفيدين من شراء البحوث.
وعلى حد ما قالت مصادر موقع "گود" حجزت الفرقة الوطنية للشرطة القضائية آلة طابعة وبيسي بورطابل وبيسي فيكس ومطبوعات ملونة كيخدم بها الاهداءات للوالدين لمقدمة البحوث ديال نهاية الدراسة، وعاود ثاني مطبوعات غير مستعملة فيها كلمة شكر للاساتذة الجامعيين منهم رئيس شعبة القانون العام المحكوم بعام ونص ديال الحبس في ملف الجنس مقابل النقط.
وفي تصريحات الطالب هشام بومعزة قال على ان تحويلات المالية للموظف محمد ليتوسي كانت غا سلف، وبلي هو جا للابوجي كسطاجير ،والتحويلات ديالو لي وصلات في بعض الاحيان ل 182 تحويل ديال بيع البحوث محددا في 1500 درهم باستخدام تقنية "كوپي كولي".
واما الموظف محمد ليتوسي نكر انه هو لي مزور النقط وقال على انو شي حد شفر ليه المو دو باس ديالو وعلى التحويلات قال على انها غير ديون ديال ناس مسلفهم.
الابحاث وصلات لان مرات الموظف حتى هي كانت كتدير تحويلات مالية واخا هي بيطالية مخداماش وهاد الشي جاب الشبهة ديال انها حتى هي كانت وسيطة.
المهم غادي نتسناو نهار 19 اش غيقولو هاد المتهمين قدام قاضي التحقيق واش غادين يگرو بشركاء اخرين واش غادين يعاودو يجبدو محمد بوجنون منسق ماستر المالية العامة المسدود بسبب الخنز ديالو ولي صوڤاه غا التقادم في ملف الجنس مقابل النقط.