البابور غادي وكيغرق.. البرلماني النصاب زور على شريكو وهادي تفاصيل الشكاية الجديدة بيه وبخوه

هاد البابور غادي وكيزيد يغرق، هاد النصاب البرلماني ديال سطات المضروب ب5 سنين ديال الحبس غير فضوصي واحد راه موضوع شكاية جديدة تحطات أمام النيابة العامة في المحكمة الزجرية بعين السبع فكازا.
تفاصيل الشكاية اللي كتتوفر "گود" على نسخة منها، رفعها شريك ديال البابور إلى النيابة العامة من بعد ما استامعات ليه الفرقة الولائية للامن في الدار البيضاء في ملف رفعاتو شركة "ماروك ليزينكَ".
شريك البابور واجهوه البوليس بوثائق فيها التوقيع ديالو، وهو تفاجأ بهادشي فناض دعا البابور وخوه ودعا معهم حتى هاد الشركة ديال"ماروك ليزينكَ"، اللي كاين المقر ديالها فشارع عبد المومن، ونسيب البابور اللي مشدود فحبس سطات بتهمة النصب.
مزورين البابور الصغير وبوشعيب البابور على شريكهم باش نصبو على 6 مليار على "ماروك ليزينكَ"، ومنين عرضات الفرقة الولائية للأمن الوطني هادشي على مول هاد الشكاية نفى وبين ليهم بللي التوقيعات ماشي ديالو وبأنهم غير مزورين داكشي كلو وناصبين بسميتو والدليل على هذه الكلام هو أن خو البابور هو اللي باع الآليات والكاميونات ديال "ماروك ليزينكَ" اللي كانو محجوزين وما تبقى من الآليات اختفى فأماكن مجهولة.