الوينرز للجمهور اللي غادي يحضر للماتش: اللي كيبغي الحمرا ما خاصوش يؤديها وبعدو على الاستفزازات الرخيصة راه باغيين التأهل

اليوم لاعبة الحمرا ضد شباب بلوزراد فروتور ربع نهاية عصبة الابطال الافريقية فملعب محمد الخامس فكازا. الوداد كانت ربحات فالذهاب فالجزائر.
ماتش مهم للكورة المغربية خاصة بعد اقصاء الرجا البارح. البارح كانت فوضى كبيرة فالتيران بسباب تذاكر الماتش. كلشي كانت فيه مشكلة. وفماتش الاياب كان جمهور الفرقة الجزائرية سب جمهور الوداد ولمغاربة
"الترا وينرز 2005′′ دارت بيان فيه دعوة لاعضاءها ولجمهور الحمرا باش يتحلاو ب"بالمسؤولية واعطاء صورة راقية عن جمهور الوداد الرياضي"
كما دعا البيان للتنظيم الذاتي "لننظم أنفسنا بأنفسنا ، من يحب الوداد لا يمكن أن يتسبب في إيذاء ناديه بأي طريقة من الطرق"
واكد الفصيل ان الهدف الاول فهاد الماتش هو التأهيل ماشي استغلال الماتش "لخلق الفتنة فمن الافضل له عدم التنقل للملعب" وان هاد الشي محتاج لضرورة ضبط النفس "وعدم الانجرار والرد على الاستفزازات الرخيصة التي حدثث في مباراة الذهاب وعدم اقحام السياسة في المباراة"
فهاد السياق دعا الفصيل الجمهور باش ما يلوحش لقراعي والمواد الصلبة على ارضية الملعب "فالمتضرر الأول من هذه الأفعال هم حاملوا الكرات ورجال الوقاية المدنية"
ودعا الى عدم استخدام اللايزر لانو يقدر يتسبب فعقوبات ما محتاجهاش النادي وطلب من المسؤولين تحمل مسؤوليتهم فالتنظيم باش كلشي يدوز مزيان