مدرب الوداد: براڤو الراجا وتستاهلو نخسرو وانا المسؤول على هاد النتيجة ولكن راه مازال حنا اللولين

الركراكي مدرب الوداد البيضاوي اعتارف بهزيمتو ضد الراجا اليوم بجوج لزيرو فماتش مؤجل عن البطولة الوطنية. الركراكي هنأ الخضرا وقال "براڤو الراجا"
المدرب كان صريح بحال ديما وقال باللي فرقتو ما كانتش حاضرة فالميطا الاولى لا فيزيكمون ولا مونتطالمون. وبللي فالميطا الثانية حاولات الوداد ترجع ولكن جا البيلانتي الثاني.
المدرب قال باللي ماتشات بحال هادو كيتلاعبو فالتفاصيل وهادا ما وقع
وليد الركراكي قال باللي تعامل الفرقة ديالو فهاد الماتش كان فشي شكل ماشي تعامل نادي ربح كأس افريقيا٬ ليستدرك "ما عليش مازال عندنا 5 الماتشات وحنا هما اللولين وراني قلتها من النهار الاول هاد اللقب غادي يتلعب حتى لاخر دورة"
وقال خاص الدراري يفيقو باش يكملو. واضاف "خاص نقبلو الهزيمة بحال اي نادي كبير" واضاف "انا المسؤول على هاد النتيجة. انا اللي دخلت هاد الفرقة. بلا ما نقلبو على التبريرات"
المدرب قال باللي الرجا برافو عليها حقاش ما غادياش تخلينا مرتاحين ووعد باللي حتى الوداد ما غادياش تخليهم مرتاحين وباللي هي مازال الاولى فالبطولة.
وفسؤال واش الوداد دخلات للماتش باش تخسر وباللي هاد الشي بان فبون توش فالتصرفات ديال المدرب فالتغييرات اللي دار ؟ رد الركراكي "عندك الصح"