براد بيت: بعدما تفارقت مع أنجلينا جولي قلبي تقطع ودوزت فترة خايبة بزاف

الممثل الميريكاني براد بيت كشف لأول مرة فحياتو على التفاصيل اللي عاشها بعدما تفارق مع مراتو السابقة أنجلينا جولي (47 عام)، واللي كانو تزوجو ف2014.
النجم الهوليوودي (58 عام)، قال أن قلبو تشرشم وتقطع مللي تفارق مع أنجلينا جولي، وتكرفس بزاف بسباب الاضطرابات العاطفية وقلبو تعصر بالحزن.
وأضاف فتصريح لمجلة "GQ" البريطانية: "حياتي كاملة وأنا كنحس بالوحدانية، مللي صغير كبرت بوحدي، وحتى هنا فلوس أنجلوس كنت كنلقى راسي معزول شوية، ومابديت كنحس بحب صحابي وعائلتي حتى كبرت".
ف2016 حضر براد بيت اجتماعات ديال المبليين بالطاسة، اللي متبعين بروكَرام باش يتعالجو من الإدمان، وتبع الحصص عام ونص باش مايبقاش يسكر و"يخوي ذاتو من لالكول"، وهادشي اللي نجح فيه وحتى الكَارو نقص منو وولى بيخير، وأشار كيفاش أن فترة الحجر الصحي فذروة انتشار جايحة كورونا نفعاتو وحاول يبدل من البليات الخايبين ديالو شوية بشوية.