احداث مليلية. بوريطة المنفوخ باش تكون صورة المغرب خايبة كيغبر وباش اجهزة اخرى كتجيب للمغرب حوايج زوينة كيتلاح عليها ويتصور ويبان

كون عندنا معارضة تحمر لوجه كون من غدا استدعات وزير الخارجية والتعاون ناصر بوريطة باش تسولو على اللي وقع فمعبر بني نصار حدا مليلية. دابا ماتو 23 شخص بغاو يدخلو من هاد المعبر لاسبانيا صحة. تصاور خايبة تنشرات. فيديوات مكرفصة. صورة بلادنا فشي شكل.
كيف عادتو ديما وزير خارجيتنا مخبي. ضارب الطم. ساكت. لا دار لقاءات مع السفراء الافارقة يشرح ليهم اش وقع لان هاد الشي كيشوه صورة بلادنا. لا دار تصريحات للاعلام اللي كيجبد صورتنا هاد ليام. لا عقد ندوة صحافية يفسر موقف الدولة المغربية.
باش تكون شي حاجة خايبة كيف عادتو كيغبر. كيختفي. اما باش تكون شي اخبار مفرحة واخا هو ولا وزارتو ما دارت والو فيها٬ كتلقاه كيعرض على صحابو فالاعلام ويديهم للداخلة او لعيون ويهز لمقص ويبان. يتصور ويضحك.
هادا هو وزير خارجيتنا. عاحبو راسو. عزيز عليه راسو كثر من كلشي.