ياك كان هاز مقص ويدور ودابا خاصو يتحاسب على اغلاق بورندي قنصليتها. كيفاش هاد بوريطة خلق ذباب الكتروني باش يطلقو صفحات كتمجدو فالوقت اللي صفحة رئيس الدولة ما بقاتش – تصاور

بوريطة مقابل الصفحات لّي كتمجدو وخلاّ بوروندي تسدّ قنصليتها فالعيون. علاش ما يستابقش الحدث ويورينا حنّة يديه باش يوقف هاد الإجراء لّي جا فوقت خايب ؟
بوروندي علنات على أنها سدّات قنصليتها العامة فالعيون لي كانت فتحاتها بتاريخ 28 فبراير العام الفايت، وهادشي ما كانش بسباب إعادتها النظر فموقفها من الوحدة الترابية ولكن لأسباب تقشفية و مالية بالدرجة الأولى.
هاد الأسباب ما تعطيش لوزير الشؤون الخارجية والتعاون الأفريقي والمغاربة المقيمين بالخارج، ناصر بوريطة العذر باش يبقى يتفرج ويدّيها فالصفحات لي مقابلاه بالتمجيد النهار وما طال وخلات الطبلة وولات كتعزف ليه على السكسوفون گاع بحال إلى هو لّي كاين فهاد المغرب، و بحال الا هاد الإنجازات هو لّي سبابها و هو لّي محققها وولى يسحاب ليه راسو هو وحدو مضوي لبلاد.
الإجراء للي دارت بوروندي ما كانتش تديرو أصلا لو كانت عندنا بالفعل دبلوماسية قوية گادرة و حاضرة فكل صغيرة و كبيرة فلافريك ولوكان خصوصا بوريطة داير خدمتو.
لوكانت عندنا خارجية تديها فالخدمة، وتخلي عليها لمعاطية هنا و لهيه،كون تداركنا الموقف وما عطيناش ولا صفر فالمائة من الفرصة للشياتة ديال العسكر الجزائري يفتحو فوامهم ويهضرو علينا.
بوريطة ما دارش خدمتو. وكان عليه يدخل على الخط ديريكت و قبل ما يصدر القرار ويحاول على الأقل يخفف من وقع هاد الإجراء ولو بتقليص التمثيل الدبلوماسي ديال بوروندي فالعيون او ينقصو الموظفين أو يلقاو شي حل آخر عوض السدّان هكّا ديريكت، ولكن هادشي ما كانش و في الأخير صدر هذا القرار و سدّات بوروندي قنصليتها العامة.
بوريطة تقاعس فقضية المغرب الأولى لّي هي الصحرا المغربية، ملف كبير ومافيهش اللعب، وخاصو يتحاسب على هاد الإجراء لّي وصلات ليه بوروندي فاش سدّات القنصلية وما وفاتش بوعودها السابقة فالوقوف معانا فقضيتنا الوطنية، هاد الإجراء ديال السدّان كيفما كانت الأسباب ديالو راه كيقيس قضية الصحراء المغربية وكيضرب فالعمق لّي كيروّج ليه ناصر بوريطة فندواتو و تصريحاتو الصحافية، خصوصا فهاد الفترة الحساسة من نزاع الصحرا وشياتة العسكر الجزائري كيقلبو على أي حاجة، على سبة و خا غير بالكذوب فما بالك بحاجة وقعات فعلا، باش يعمرو صفحاتهم وصحافتهم بعدما ضربنا كل أوهامهم و خرايفهم فالزيرو.
بوريطة شفناه هاز مقص ديالو وكيدير افتتاح قنصليات. كيركب على خدمة اجهزة اخرى خاصة "لادجيد" ودابا باش تسدات سد فمو.
اش مقابل دابا؟ السيد بغى ينافس لكبار فهاد لبلاد. حتى رئيس الدولة حيد صفحة كان كيسيرها سفيان بحري. دابا بوريطة خلق ذباب الكتروني ديالو وهادي هي استراتيجيتو الجديدة فالتواصل. مخدم وحدة معاها فرقة مكلفة غير بالتواصل الاجتماعي. مقابلة فالحقيقة غير صورتو.
ودابا فاش نفعوه هاد الصفحات ديال الغياطة والطبالة، واش هوما لّي غادي يرجعو بوروندي تعاود تفتح قنصليتها فالعيون؟