شوهتنا غادية وتكبر ففاجعة مليلية. واش حفل مالوما اللي كيموت على المغرب تلغى؟ مصدر رسمي ل"كود": كنستعدو وهو كتب: فين غادية الانسانية ايلى بقينا شادين هاد الطريق

الفنان العالمي مالوما طالع ليه الدم على اللي وقع فمليلية. نشر صورة خايبة فحسابو على الانستگرام معاها هاد العبارة "يا الهي. اش هاد الشي. فين غادية هاد الانسانية ايلى تبعنا هاد الطريق". دار صورة مهاجرين شي فوق شي من فاجعة الجمعة اللي فاتت واللي مات فيها 23 مهاجر.
دابا كاينة هدرة على الغاء حفلو. السيد عزيز عليه المغرب وسبق ودار النشيد الوطني گاع. لبس التوني. دابا القضية صعيبة. مصادر قالت ل"كود" باللي الحفل فالاتجاه باش يتلغى بل تلغى. الحفل غادي يكون ليلة الجمعة السبت فاتح يوليوز و2 منو بالملعب الكبير بمراكش. باش يدير تدوينة قبل 24 ساعة من هاد الحفل راها صعيبة.
مصدر مسؤول فمراكش رد ل"كود" باللي ما عندهم خبار. باللي ما كاين حتى شي قرار رسمي وكلشي كيوجد كيف كان. الاستعدادات مستمرة.
مصدر اخر ف"كود" قال باللي ايلى تلغى الحفل المشكلة لكبيرة هي التذاكر وقلل من الغاؤو "راه فنان عالمي دار عقد وما يمكنش يجي فاللخر ويلغي حفل بهاد السهولة".
دابا حتى ايلى ما لغاهش ممكن يستغل الحفل لكبير ويدوز ميساجات قوية. فوق لاسين من حقو يعبر على تضامنو مع الضحايا.
وسبق للشركة أن أعلنت عن أسعار تذاكر الحفل، الذي كان مبرمجا أن تفتح أبواب الملعب لولوجه ابتداءً من الساعة الثامنة والنصف من مساء غدا الجمعة، ستتراوح بين 290، و390، و590، و1200، و1400، و2000 درهم.
وسبق للنجم الكولومبي "خوان لويس لوندونو أرياس" (28 سنة)، المشهور باسمه الفني " مالوما"، أن نظم العديد من الحفلات الغنائية بالمغرب،كما شارك،سنة 2019، في مهرجان "موازين".
يشار أيضا إلى أنه سبق للفنان العالمي مالوما أن زار مراكش، التي صوّر فيها فيديو كليب أغنية "ماريا" مع ميتر جيمس.