3 أيام والجثة ديال شاب غرق فبحيرة تسليت باملشيل غابرة. الساكنة كاعيا من غياب فرق الإنقاذ.. ومصدر ل"گود": فرق الغطس جبداتو اليوم

ساكنة املشيل كاعية من تأخر فرق الانقاذ وغياب وسائل الانقاذ فبحيرة تسليت الجميلة، بسبب غرق شاب عشريني يوم الاثنين 22 غشت الجاري، في هذه البحيرة. اليوم تجبد، غير بشويا تمكنو فرق الغطس يجبدوه.
غياب فرق ووسائل الانقاذ لانتشال جثة الشاب مهدي، غضب الساكنة ديال املشيشل خصوصا ساكنة دوار ايت علي ويكو، بحيث خرجت الساكنة للاحتجاج وقطعات الطريق، هادشي خلا السلطات تحرك وتدخل.
الناس خرجات فمسيرة احتجاجية بسبب التهميش ديال المنطقة السياحية، خصوصا وأن الشاب غرق هادي ثلاثة ايام ومكاينش لي يجبدو، اضافة إلى الفقر والتهميش لي كتعيشها هاد المناطق النائية.
وقال باسو، أحد أفراد عائلة الفقيد، في اتصال مع "كود"، :"المهدي فعمرو 21 سنة وهو طالب جامعي، مشا كيعوم مع صحابو الاثنين وغرق، وكاين شويا الاهمال فالاول وهادشي خلال الساكنة تحتج والسلطات تدخلت".
وأوضح باسو بأن فرق الانقاذ ديال الوقاية المدنية تدخلت وكاينا حاليا 7 أفراد من الغواصين، كينزلو 3 وكيخرجو بالتناوب، لكن لحد الان مزال مجبدوهش.
وعلمت "كود" أن المخرج السينمائي المشهور كمال هشكار، يتواجد بالمنطقة، وقدم المواساة لأسرة الفقيد، ووقف بجانبهم فهاد المحنة.
حاليا باقي مجهودات السلطات خصوصا فرق الانقاذ متواصلة باش يجبدو الجثة ديالو.
مصدر كشف قبل قليل ل"گود" أن فرق الغطس نجحت في انتشال جثة مهدي من بحيرة تيسليت.