وليد الركراكي: كنشكر حاليلوزيتش حيت اهلنا للمونديال وكنتمنا نفرحو المغاربة ونرفعو الدرابو – فيديو

عبر وليد الركراكي على السعادة ديالو حيث غيدرب المنتخب الوطني المغربي لكرة القدم، وشكر رئيس الجامعة فوزي لقجع على الفرصة اللي عطاه، وأكد على أنها مسؤولية.
وقال وليد الركراكي: "كانشكر فوزي لقجع والجامعة الملكية المغربية على الثقة ديالهم وأنا والصطاف ديالي عارفين المسؤولية اللي علينا.. وعارفين الضغط اللي علينا خصوصا أن المغاربة كيبغيو الكرة والمنتخب المغربي، والجمهور كايبغي النتائج والأداء، ونتمنى فكأس العالم نرفعو الراية ونفرحو المغاربة".
وعلن الركراكي أن المرحلة الماضية فليكيب ناسيونال ماكاتهموش، وشكرا المدرب السابق وحيد حاليلوزيتش على العمل اللي قدمو.
وقال الركراكي: "ماكيهمنيش شنو وقع قبل مني، انا الان دخلت للمنتخب وعارف شنو باغي وعارف شنو كانتسنا من اللعابا، اللي داز قبل ما كايهمنيش كانشوف القدام، اللي خاصني نقول هو شكرا لوحيد خاليلوزيش حيث أهلنا لكأس العالم مانساوش الخدمة اللي دار".
وأكد الركراكي : "دابا كاين بروجي آخر مع لامونطاليتي ديالي، وغانتسنا من اللعابا الالتزام وأي واحد غايجي لليكيب ناسيونال عارف بلي كاين 40 مليون مغربي كايتسناوه يتقاتل، وأي لعاب غايجي للمنتخب خاصو يتقاتل، وجيت لليكيب ناسيونال باش نربح وهاذي هي عقليتي".