سكوب. "إهانة البرلمان" بلوكا المهمة الاستطلاعية لي كتحقق ف"سلاسل تسويق المنتجات الفلاحية".. ومصدر برلماني ل"كود": وقفنا إلى أجل غير مسمى

علمت "كود" من مصدر مطلع أن المهمة الاستطلاعية للوقوف على شبكات توزيع وتسويق المنتجات الفلاحية، اللي دارها مجلس النواب، توقفت عن العمل إلى أجل غير مسمى.
وحسب مصدر "كود" فأن اللجنة الاستطلاعية قررت اليوم الاثنين 26 شتنبر الجاري، التوقف عن العمل، بسبب "الإهانة" لي تعرضو ليها البرلمانيين الاعضاء فالمهمة الاستطلاعية قدام الباطوار (مجازر الدار البيضاء) صباح يوم الاربعاء 14 شتنبر، فاش منعوهم السيكريتي يدخلو للكرنة.
البرلمانيون كعاو بزاف وقررو يوقفو المهمة الاستطلاعية حتى يتدخل رئيس مجلس النواب الطالبي العالمي ويصحح هاد الاهانة لي تعرضو ليها، خصوصا وأن عمدة الدار البيضاء نفات للمهمة الاستطلاعية توصلها بمراسلة تخص زيارة الوفد البرلماني لمجازر كازا.
وعلمت "كود" أنه بسباب هاد الفضيخة قرر رشيد الطالبي العلمي رئيس مجلس النواب يتلاقا مع أعضاء المهمة الاستطلاعية يوم الاربعاء على الساعة العاشرة صباحا.
إلى ذلك، كان من المنتظر تعقد المهمة الاستطلاعية لقاءا مع وزارة النقل واللوجستيك مساء اليوم، لكن تأجل بسبب قرار أعضاء المهمة التوقف عن استكمال اشغال المهمة إلى حين اعادة الاعتبار لصورة المؤسسة التشريعية اللي تمرغت فالارض الاربعاء الماضي. كما انه الاجتماع لي عند المهمة غدا فالبرلمان تلغا.
وعقدت المهمة المهمة لقاءا مع مديرية الجماعات المحلية بوزارة الداخلية حول وضعية الاسواق، قبل أن تقرر مساء اليوم وقف مسار المهمة إلى حين.
هاد الفضيحة لي وقعات بسباب منع إدارة مارشي الكرنة لي كتسيرو شركة التنمية المحلية برلمانيين يدخلو يديرو خدمتهم، وخلاوهم واقفين قبالت الباب كثر من نصف ساعة.
الواقعة طرات مع 7 صباح تقريبا من يوم الاربعاء 14 شتنبر 2022، حسب مصدر برلماني ل"كود" :" مبغاتش المديرة تدخلنا، وهادي اهانة وسابقة فتعامل مديرة مصلحة مع المؤسسة البرلمانية".
ورغم توصل الكرنة بمراسلة رسمية من رئاسة مجلس النواب بخصوص هاد المهمة الاستطلاعية، الا ان المديرة منعات الوفد البرلماني خصوصا وان ديك الوقت الكرنة فيها الفوضى.
فاش تعرضو للمنع، حاول عدد من النواب اتصلو بالعمدة نبيلة الرميلي، لكن مكتجاوبش.
الوفد البرلماني كان زار سوق الجملة ولقاء فيه الفوضى وكثرة المشاكل وتلاعبات، وكولشي كيتشكا من سوء التسيير ديال شركة التنمية المحلية.
المهمة الاستطلاعية كيترأسها برلماني كان بغا يستاقل ومقدش على المسؤولية. هاد البرلماني هو عادل دفوف رجل اعمال فالعقار معندو علاقة بموضوع التسويق الفلاحي.