جبران: ماتش الأحد ضد ريفرز ماشي ساهل والوداد كينافس على لقب العصبة

أكد يحيى جبران قائد الوداد الرياضي أن الفريق الأحمر دخل لمنافسات دوري أبطال إفريقيا باش ينافس على اللقب اللي ربح الموسم الماضي وأن الماتش ديال غدا الأحد فدونور، ضد ريفيرز يونايتد النيجيري ما غاديش يكون سهل لكن الفريق غادي يقدم اللي عليه باش يتأهل لدور ليكروب.
وقال يحيى جبران فتصريح له قبل ماتش بطل إفريقيا وريفرز النيجيري: "الوداد خاصو يلعب على التتويج، وهدفنا فماتش ريفرز النيجيري هو حسم التأهل لدور ليكروب اللي تعود يكون فيه الواك".
وبخصوص توقع الكابيتان ديال الوداد لمستوى الماتش ضد الفريق النيجري قال جبران: "كيتسنانا ماتش صعيب غدا، راه المباراة حاسمة بالنسبة لنا للتأهل الدور الجاي، ونتمناو نكونو نهار الأحد واجدين وجاهزين باش نربحو الماتش".
جبران أكد أن الوداد داخل فهاذ النسخة من أجل الدفاع على اللقب اللي ربح الموسم اللي فات وقال: "الهدف ديالنا هو المنافسة على جميع الألقاب فالبطولات اللي غادي نلعبو فيهم هذا الموسم، وحنا مرشحين للتتويج بدوري أبطال إفريقيا وغادي نديرو كل مجهودنا باش نربحو اللقب ديال هاذ النسخة".
للإشارة فالوداد الرياضي غادي يكون مطالب بتحقيق الفوز بهدف واحد لزيرو على الأقل ضد ريفرز يونايتد النيجيري فماتش روتور دور 32 من دوري أبطال إفريقيا، باش يتجاوز الخسران ديال ماتش الألي بهدفين مقابل واحد ويتأهل لدور ليكروب.