طنجة والزاكي خسرو الماتش الخامس فالبطولة والفتح طلع للصدارة

خسر إتحاد طنجة الماتش الخامس له على التوالي هاذ الموسم، وخسر مع فريق الفتح الرياضي فالماتش اللي تلعب هاذ العشية فتيران الأمير مولاي الحسن فالرباط، ضمن الجولة 6 من البطولة الاحترافية لكرة القدم.
وانهزم إتحاد طنجة بقيادة المدرب بادو الزاكي مع الفتح الرياضي بهدف واحد لصفر، وهو البيت اللي ماركاه حمزة هنوري فالدقيقة 20، وحافظ عليه الفتح حتى سالا الماتش، مع العلم أن المباراة توقفت فالشوط الثاني بسبب دخول بعض جماهير اتحاد طنجة لأرض الملعب حيث كانت غاضبة من اللعابا والطاقم التقني.
وبهاذ الخسران كيواصل إتحاد طنجة الانطلاقة الكارثية ديال الفريق مع بادو الزاكي فهاذ الموسم، حيث لعب 5 مباريات خسرها كاملة، وعندو 0 نقطة وغرق فالمركز الأخير فالبطولة وعندو ماتش مؤجل مع الوداد الرياضي الأربعاء الجاي، أما الفتح الرياضي فرفع الرصيد ديالو من بعد هاذ الرباح إلى 12 نقطة وانتزع الصدارة مؤقتا.