الحمرا ربحات الخضرا وزادت فمشاكل مول الزبل

ربح الوداد الرياضي الغريم ديالو الرجاء الرياضي فماتش الديربي اللي لعبوه اليوم الأحدفتيران المركب الرياضي محمد الخامس بالدار البيضاء، فمؤجل الجولة 6 من منافسات البطولة الاحترافية لكرة القدم.
وتمكن الوداد الرياضي من الفوز بنتيجة 2 بيوتا مقابل واحد، وانتظر الوداد الشوط الثاني باش يماركي الهدفين ديال الربح من بعدما سالا الشوط الأول بالتعادل زيرو لزيرو مع العلم أن يحيى جبران الكابيتان ديال الواك ضيع ضربة جزاء على الحمرا تصدى لها بنجاح أنس الزنيتي الكابيتان ديال الخضرا وهاكا سالات الجولة الأول تعادل.
وفالجولة الثانية قدر الوداد يوصل للمرمى ديال الرجاء وغادي ينجح أيمن الحسوني فتسجيل اول بيت للحمرا فالدقيقة 57، وهو الهدف اللي تطلب تدخل غرفة الفار باش يتم احتسابو من بعدما علن الحكم المساعد الأول على تسلل، وتمكن من بعد منها أرسن زولا مدافع الوداد من استغلال سوء تغطية فدفاع الرجاء وسجل البيت الثاني للحمرا فالدقيقة 80، ومن بعد منها غادي تتمكن الخضرا من الحصول على ضربة جزاء نجح من خلالها محمد الناهيري فتقليص الفارق للرجاء وماركا الهدف الأول للنسور، وحاولو من بعد منها اللعابا ديال الرجاء يرجعو فالماتش لكن غاب عليهم التركيز وسالا الماتش اللي توقف الوقت فيه بزاف المرات لأسباب مختلفة اما بالشهب الاصطناعية أو بالرجوع للفار.
وبهاذ الرباح رجع الوداد الرياضي لصدارة البطولة برصيد 14 نقطة، أما الرجاء الرياضي فمن بعدما خسر ثاني ماتش فالبطولة فهاذ الموسم فظل المركز 12 تجمد الرصيد ديالو عند 6 نقاط.