نايضا فوجدة قبل ماتش الوداد.. جمهور المولودية ساخط على هوار وها شنو غادي يدير

قرر جمهور مولودية وجدة يواصل مقاطعة ليماتش ديال فرقتو وما يحضرش ضد الوداد الرياضي السبت الجاي فالتيران الشرفي فوجدة، ضمن الجولة 7 من البطولة الإحترافية لكرة القدم، وأيضا التصعيد فوجه الرئيس محمد هوار بسبب الوضع اللي كيعيشو الفريق.
وعلن بريكاد وجدة الفصيل المساند للمولودية أن قرار مقاطعة ليماتش ديال الفرقة مازال ساري المفعول، أي أن الجمهور الوجدي ما غاديش يكون حاضر فالمباراة ضد الوداد الرياضي الويكاند الجاي.
الفصيل الوجدي قرر يصعد فوجه رئيس مولودية وجدة محمد هوار واعتبر أن الوعود اللي تعطات للجمهور الوجدي مجرد وعود كاذبة، وغادي ينظم وقفة احتجاجية الجمعة المقبل، وأكد على الجمهور ديال المولودية باش يجي ويشارك فيها بهدف إرجاع الفرقة لسابق عهدها وهدم الفساد وبناء الامجاد حسب تعبيرو.
وكيدوز مولودية وجدة من فترة صعيبة، الامر اللي كايخلي فرص الرباح ديالو فماتش الوداد الرياضي السبت الجاي قليلة، حيث اللعابا كيقاطعو التداريب بسبب مستحقاتهم وكاين غضب كبير من جمهور الفرقة على إدارة النادي والمراكز الأخيرة اللي كيحتل فالبطولة، بالمقابل فالوداد كيعيش مرحلة مزيانة حيث جاي من رباح فالديربي على الغريم الرجاء الرياضي وكيتصدر البطولة.