طنجاوة حتى هما ناضو للتحكيم وكيهددو بالتصعيد ضد الحكم جيد وحكم الفار فالماتش ديالهم مع الماص

انضم إتحاد طنجة للفرق اللي كتحتج على التحكيم فالبطولة الإحترافية وعبر على الغضب ديالو من التحكيم اللي كان فالماتش اللي لعب ضد المغرب الفاسي فالجولة 7، وهو الماتش اللي كان فيه الحكم رضوان جيد كحكم ساحة، ومنصف زين العلوي فغرفة الفار.
إتحاد طنجة ناض كيحتج وصدر بلاغ قبل قليل حول ما اعتبرهم أخطاء تحكيمية وقال فيه: "كيعبر لمكتب المديري لنادي اتحاد طنجة عن استنكارو والاستياء الشديد للقرارات التحكيمية اللي صدرات فحق الفريق اثناء استضافتو لفريق المغرب الفاسي بمناسبة الدورة السابعة من البطولة الاحترافية لكرة القدم هاذ القرارات الظالمة اللي صدرت عن الحكم رضوان جيد و عن غرفة الفار فشخص الحكم منصف الزين العلوي، تمثلت أساسا في احتساب ضربة جزاء ظالمة للفريق الخصم في وقت كان يتعين فيه احتساب ضربة خطأ لصالح حارس المرمى اللي تم إسقاطو فالأرض أمام أعين حكم اللقاء".
وزاد اتحاد طنجة وصعد فكلاكو وقال: "كيستنكر المكتب المديري بجميع أعضاؤ هاذ الخطأ التحكيمي الجسيم اللي أثر على نتيجة المباراة وغيرها خارج قواعد المنافسة الرياضية الشريفة ومبدأ تكافؤ الفرص و أساء الى كرة القدم المغربية، وكنعلنو على أننا عازمين على اتخاذ جميع الإجراءات القانونية المناسبة أمام الجهات المختصة ضد الحكمين المذكورين، خاصة حكم غرفة الفار منصف الزين العلوي اللي تبين بالملموس أن جل قرارته فالعديد من المباريات كانت متحاملة ضد الفريق و غير متسمة بالحياد و الإنصاف".