3 مدن مرشحة لاحتضان معسكر الوداد وأسباب واقعية خلات بطل المغرب وإفريقيا يتجنب السفر للكويت

غادي يدخل الوداد الرياضي فمعسكر إعدادي مغلق فالأيام اللي جايا، اللي غادي تكون البطولة الإحترافية موقفة فيها بسبب مشاركة المنتخب الوطني المغربي فكأس العالم.
وكشف مصدر مطلع أن الطاقم التقني للوداد الرياضي بقيادة الحسين عموتة، غادي يبرمج للعابا ديال الفرقة حصص تدريبية فتيران بنجلون من بعدما يرجعو من اليومين ديال الراحة اللي تعطات لهم، ومن بعد منها غادي يدخلو فمعسكر إعدادي مغلق.
نفس المصدر قال بلي الحسين عموتة والطاقم اللي معاه باغيين يديرو معسكر إعدادي مغلق للفرقة يكون قريب من كازا وفمدينة تكون فيها ملاعب، والتفكير ديالهم مركز على الجديدة أو نواحي الرباط أو مدينة مراكش على أبعد تقدير، مع العلم أن الحمرا غادي تلعب ديماتش أميكو فانتظار يتحددو الفرق اللي غادي تواجههم.
وفنفس السياق، وضح ذات المصدر أن الوداد الرياضي تراجع على المشاركة فالدوري الودي الإعدادي فالكويت بقرار من المدرب الحسين عموتة، لأسباب واقعية وفضل أن الحمرا تتدرب فالمغرب وحتى الفترة ما بين التوقف واستئناف التداريب ما تكون طويلة.
ومن بين أسباب بقاء بطل المغرب وإفريقيا للتحضير فالمغرب هي بعد المسافة ما المملكة المغربية والكويت، وتحسبا لأي طارئ حيث ممكن ترجع المنافسات ديال البطولة فحالة خرج المنتخب المغربي بكري من كأس العالم، وأيضا كاين عامل العياء اللي غادي تخلفو الرحلة على اللاعبين بالإضافة إلى كثرة المباريات حيث المدرب الودادي ما باغيش يفوت واحد العدد معين من ليماتش باش اللعابا تبقى عندهم لافريشور ويجنبهم الإصابات ويكونو جاهزين لاستئناف البطولة.