خاليلوزيتش عقل على الملح والطعام.. المدرب السابق للمغرب سولوه الكرواتيين على المنتخب ومابغاش يتكلم

صان الناخب الوطني السابق البوسني وحيد خاليلوزيتش العشرة وتجنب يبرزط المنتخب الوطني المغربي والطاقم الجديد ديال ليكيب ناسيونال قبل مونديال قطر 2022، اللي كان هو اللي غادي يمشي له قبل ما ياخد وليد الركراكي بلاصتو.
وفحوار نشرو موقع "net.hr" الكرواتي، كان وحيد خاليلوزيتش صارم فالجواب ديالو ملي سولوه على المنتخب الوطني المغربي وبلي كان هو اللي غادي يكون دابا فقطر ويلعب الأربعاء الجاي ضد كرواتيا وأكد بلي ما غاديش يتكلم على المغرب بشي حاجة خايبة.
وحيد خاليلوزيتش واخا حاولو فالحوار يبروفوكيوه باش يخرج العيب ضد المغرب، ويجبد نقاط القوة والضعف ديال المنتخب المغربي ولكن ما سقطش فالفخ ديالهم وقال: "ما غاديش نقول كلمة وحدة ضد المغرب وماغاديش نرجع لهاديك القصة، باغي ننساها فأقرب وقت ممكن".
وواصل الناخب الوطني السابق اللي كيعرف المنتخب المغربي مزيان حيث 3 سنين وهو كيدربو وتكلم غير على الماتش ما بين الأسود وكرواتيا وقال: "اللي غادي نقول هو أن مفتاح نجاح المغرب فهاذ الماتش هي لاديسيبلين فالفرقة وفالتكتيك فالتيران، حيث كل ماتش فالمونديال غادي تكون فيه معركة تكتيكية، حيث كأس العالم هي مسابقة كيكون فيها دور كبير للإمكانيات الفنية والتكتيكية والصبر والاستعداد، والفريق الوطني اللي ماعندوش انضباط فاللعبة غادي يلقا صعوبة كبيرة باش ينجح وكاع الفرق غادي يجيو منظمين".