رونار والسعودية فركعو أول مفاجأة فكأس العالم وربحو الأرجنتين

حقق منتخب السعودية بقيادة المدرب الفرنساوي هيرفي رونار أول مفاجأة فماتشات كأس العالم قطر 2022، ملي رباح اليوم الثلاثاء الأرجنتين فتيران لوسيل.
وربحت السعودية ميسي وصحابو بنتيجة 2 بيوتا مقابل واحد، وكانت الأرجنتين هي الأولى اللي ماركات من بيلانتي سجلو ليونيل ميسي فالدقيقة 10، وقالوا اللي كان يتسنى فيه كلشي تكتاسح الارجنتين السعودية، نجح الناخب الوطني السابق هيرفي رونار وبلوكا ميسي وديماريا وصحابو اللي ماركاو 3 لبيوتا ولكن كانوا كاملين تسلل وسالا الشوط الأول بتقدم الأرجنتين بواحد لزيرو.
وفالشوط الثاني دخلت السعودية بوجه آخر، ومع البدية قدرت تضرب 2 بيوتا على الأرجنتين، وجاب لها التعادل صالح الشهري بهدف أول فالدقيقة 49، وضرب لها سالم الدوسري البيت الثاني فالدقيقة 53، وخلاو العالم كيتفرج على الصدمة ديال الأرجنتينيين اللي حاولو يرجعو فالماتش ولكن ما قدروش، حيث رونار بلوكا ليهم كاع اللعابا وكتف لهم ميسي وديماريا ولاوتارو مارتينيز وجد راسو معزول وسط المدافعين السعوديين اللي قدموا هما والكول ديالهم محمد العويس ماتش تاريخي وقدروا يحافظو على الرباح حتى سالا الماتش.
وبهاد الرباح تصدرت السعودية الكروب 3 برصيد 3 النقاط، أما الارجنتين عندها 0 نقطة، فانتظار التعرف على نتيجة الماتش الثاني فنفس المجموعة ما بين المكسيك وبولندا.