ها كيفاش دازت تداريب المنتخب من بعد ماتش كرواتيا واللعابا بداو كيوجدو لبلجيكيا

عرفت الحصة التدريبية ديال المنتخب الوطني المغربي من بعد التعادل ضد كرواتيا فأول ماتش من كأس العالم قطر 2022، اللي بدات اليوم الخميس فالعشية، فتيران الدحيل مشاركة جميع اللعابا باستثناء نصير مزراوي وأشرف حكيمي.
الحصة التدريبية اللي بدات مع شي 5 لعشية تقريبا، عرفت مشاركة جميع اللعابا وشرف عليها الناخب الوطني وليد الركراكي، وقسم اللعاب اللي لعبو البارح ضد كرواتيا أساسيين باش يديرو تمارين خفيفة، وباقي اللعابا الاحتياطيين تدربو بشكل عادي وسط لكروب.
الأجواء داخل الحصة التدريبية كانت حماسية واللعابا ناشطين مع وليد الركراكي والطاقم التقني، وكيبانو فرحانين ومرتاحين من بعد نتيجة التعادل ضد كرواتيا البارح فأول ماتش من المونديال، واللي كيتمنى الجمهور المغربي تكون حافز لهم ضد بلجيكا باش يربحو ويقويو حظوظهم فالتأهل للدور الثاني.
وبالنسبة للإصابات داخل المنتخب المغربي فكاينين 2 إصابات فقط حسب عبد الرزاق طبيب ليكيب ناسيونال وكيتعلق بكل من أشرف حكيمي ونصير مزراوي واللي ما شاركوش فالحصة التدريبية مع العالم أن مزراوي كان حاضر بدون ما يتدرب وكان كيبان ناشط مع صحابو فالمنتخب الوطني، وكيقدر يتمشى، وبخصوص الحالة الصحية ديالو هو وحكيمي فأكد عبد الرزاق هيفتي طبيب ليكيب ناسيونال بلي غادي يديرو فحوصات طبية أخرى باش يتاكدو واش غادي يلعبو الماتش الجاي أو لا.
وغادي يتدرب المنتخب الوطني المغربي اليوم الخميس والجمعة والسبت الجايين إستعدادا لماتش بلجيكا الأحد الجاي فالجولة الثانية من المونديال، وهو ماتش مصيري للمنتخب باش يتأهل للدور الثاني، حيث دابا هو وكرواتيا الثانيين فالمجموعة 6 برصيد نقطة وحدة خلف بلجيكا المتصدرة برصيد 3 نقاط وكندا الأخيرة زيرو نقطة.