الباندا كشف شكون غادي يربح فماتش المغرب ضد كندا وماتش بلجيكا ضد كرواتيا

كشف دب الباندا "سهيل وثريا" على المنتخب اللي غادي يربح فماتش المغرب ضد وكندا وفماتش بلجيكا وكرواتيا اليوم الأحد، فالجولة الثانية من منافسات كأس العالم قطر 2022.
وتوقعت "الباندا" اللي دايرينها المنظمين ديال كأس العالم قطر 2022 باش تدخل شويا ديال المرح على البطولة، (توقعت) يربح المنتخب الوطني المغربي فالماتش ضد كندا اليوم الأحد، وهو ثالث ماتش ديال ليكيب ناسيونال فالمونديال.
أما الماتش الآخر ما بين بلجيكا وكرواتيا عن نفس المجموعة فتوقعت "الباندا" المنتخب بلجيكي يربح الماتش ضد الكرواتيين.
وفحالة صدقت توقعات "الباندا"، فغادي يتأهل المنتخب الوطني المغربي لثمن نهائي كأس العالم قطر 2022 كمتصدر للمجموعة 6، وغادي تأهل بلجيكا كصحابة مركز ثاني، أما منتخب كرواتيا وصيف بطل النسخة الماضية فغادي يتقصى هو وكندا اللي ديجا ودعت البطولة فالجولة اللي فات.
للإشارة فدب الباندا لأول مرة كتوقع يربح المنتخب الوطني المغربي شي ماتش فكأس العالم قطر 2022، ملي بدات المنافسات، حيث فالماتش الأول توقعت يخسر المغرب مع كرواتيا وسالا الماتش تعادل وتوقعت تربح بلجيكا المغرب فالماتش الثاني ولكن المغرب هو اللي ربح.