قبل ساعات من الماتش.. الفرنسيين كيشوشو على المنتخب وها شنو دارو

صابح الإعلام الفرنسي اليوم الاربعاء موعد نصف نهائى كأس العالم قطر 2022، ما بين المنتخب الوطني المغربي والمنتخب الفرنسي، كيدير الضغط على ليكيب ناسيونال فمحاولة منو للتشويش على العناصر الوطنية حيث عارف بلي الإمكانيات الكورية ديال منتخب فرنسا ما كافياش للفوز على الأسود والتأهل لنهائي المونديال.
وسائل الإعلام الفرنسية صبحت اليوم كتنشر اخبار الانتقالات الشتوية قبل من وقتها، تخصصت فالحديث على عروض الأندية الاروبية للعابا ديال المنتخب الوطني المغربي من بعد العروض القوية اللي قدمو فكاس العالم 2022، والوصول إلى نصف نهائي المسابقة وهو الدور اللي بلغوه بعد إقصائهم لمنتخبات كبيرة وسباقة فكرة القدم العالمية فحال بلجيكا وإسبانيا والبرتغال، وخوف الفرنسيين تكون النوبة ديالهم وصلات ويتقصاو من دومي فينال.
ومن بين العناصر اللي كيحاول يضغط عليها الإعلام الفرنسي كاين جوهرة وسط التيران فالمنتخب الوطني المغربي عز الدين أوناحي اول مول الرقم 8 كيفما لقبو العبقري لويس إنريكي المدرب السابق لإسبانيا والبارصا، وجريدة ليكيب الفرنسية ما كانتش استثناء فالتشويش على اللعابا المغاربة وتكلمت حتى هي على أوناحي وقالت ان اللعاب صبح مطلوب فاندية أوروبا وقالت أن ليستر سيتي الننكليزي باغيه وقدم 45 مليون أورو لفرقتو أنجي الفرنسية.
نفس الجريدة قالت بلي ليستر سيتي غادي يدخل حرب على قبل عز الدين أوناحي حيث اللعاب المغربي باغياه حتى إشبيلية الاسبانية وأن المدرب ديالها خورخي صامباولي حاط عينه على اوناحي وباغي يطير به قبل من البارصا اللي كتوجد فالانتقالات الشتوية المقبلة للفوز بخدماتو، وأكدت بلي أنجي الفرنسي الفريق الحالي ديال عز الدين أوناحي كيوجد لما بعد رحيل اللاعب حيث غادي يمشي فالميركاتو المقبل.