دعم حكومي رجع الحياة للصحافة الورقية . اخنوش ومزور وعمور فحلف اطلاق ماكيط جديد ل"فام دي ماروك" و"نساء"

البارح فعين الدياب فكازا كان حفل لعودة مجلة تاريخية نسائية للي هي "فام دي ماروك" و"ميزون دي مارك" معاها ختهم الصغيرة "نساء" الي الطباعة بعد فترة غبرات بسباب "الكوفيد" وتبعاتو الاقتصادية الكارثية علي الصحافة. جوج مجلات نسائية رجعو للطباعة بماكيط جديد. هادا فحد راسو راه حدث كبير بزاف فالصحافة المغربية.
قبل كانت اسبوعية "لاڤي ايكو" تحولات لمجلة ورجعات حتى هي للطباعة.
مفاجأة هاد الحدث اللي كان البارح الخميس 5 يناير 2023 هو حضور رئيس الحكومة عزيز اخنوش مع جوج من وزيراته لهاد الحفل. حضرات مزور غيثة وزيرة منتدبة، لدى رئيس الحكومة مكلفة بالانتقال الرقمي وإصلاح الإدارة وفاطمة الزهرا عمور وزيرة السياحة والصناعة التقليدية. حضر لهاد الحفل ادريس شحتان رئيس الجمعية الوطنية للإعلام والناشرين وعدد من اعضاء المكتب التنفيدي لهاد الجمعية المهنية منهم خالد الحري ويوسف شميرو وبهية العمراني وفهد العراقي وفاطمة الزهراء الورياغلي٬ كما حضر مدراء نشر وصحافيون ورجال المال والاعمال وشخصيات من عوالم مختلفة.
اخنوش اللي كان مع مديرات ومدراء النشر حضر لكلمة كل من اشراق مبسط المديرة المسؤولة عن الشركة الناشرة ومديرة نشر "فام دي ماروك" وفاضل اكومي مدير مجموعة "كاراكتير" ومشى والوزيرات بقاو فالحفل
هاد التحول ديال المجلتين دار بعد اشراف اشراق مبسط على المجلتين. بدات بالماكيط وغيرات بزاف ولكن بمضمون حداثي كيحافظ على الخط التحريري لهاد المجلات المهمة للي لعبو وكيلعبو دور فنضال الحركة النسائية فالمغرب.
فخاص تكون عند المجموعة شجاعة كبيرة باش ترجع للطباعة. ازمة كبيرة ضاربة القطاع والدولة قدمات دعم كبير باش يبقى عايش٬ اخر اشكال الدعم خلصات 3 اشهر اللخرة من 2022 للصحافيين والعاملين فالمؤسسات الاعلامية.
راه مع هاد الحكومة اللي قدمات دعم كبير للصحافة تقرر كيف اعلن وزير الثقافة والشباب والتواصل فالبرلمان بمناسة اليوم الوطني للمجتمع والاعلام هادي ايام فقط رفع الدعم العمومي لهاد القطاع المنكوب من 65 مليون درهم ل200 مليون درهم سنويا