قوالب وزير الثقافة.. خلا مدير المركز السينمائي دار مابغا وتسبب فأزمة كبيرة فالصحراء وماحاسبوش وردو كاتب عام ودبا كيروج لتعيين واحد اخر

علمت "كود" بلي الخبار اللي خرجات البارح حول إعفاء خالد السعيدي من منصبه كمدير للمركز السينمائي المغربي بالنيابة مع إحتفاظه بمنصب الكاتب العام بذات المؤسسة، فايك، وزفوط.
اللي كاين وسبق "كود" نشراتو هو ان هاد المدير السعيدي مول الفضايح سالات مهمتو وسالات المدة ديال تعيينو بالنيابة، منها فضيحة كانت غاتسبب فازمة سياسية بالصحراء فاش وافق على فيلم وثائقي فيه اهانة لقبيلة الركيبات.
لي تعين بلاصت السعيدي، هو عبد العزيز البوزدايني في منصب مدير المركز السينمائي المغربي بالنيابة.
وعبد العزيز البوزدايني يشغل حاليا منصب مدير الموارد البشرية و المالية – قطاع التواصل بوزارة الشباب والثقافة والتواصل.
الوزارة بغات تبين بهاد التعيين الجديد دارت انجاز، ولكن الحقيقة ان المدير السابق مازال كيتحكم فكولشي مزال كيمارس مهامه ككاتب عام، كولشي عارف منصب الكاتب العام فأي إدارة هو كولشي.
بلاصت ما يعفي الوزير بنسعيد هاد المدير من كل مهامه ويحاسبو على أخطائه الإدارية وقراراته الجائزة، مع إلغاء كل القرارات التى اتخذها، منذ تعيينه، في حق السينما وفي حق بعض أطر المركز السينمائي، دار هاد الفيلم ديال تعيين واحد اخر بلاصتو.
الفاعلين فالسينماء كيهضرو على ضرورة إعفاء المسؤول عن قسم التأشيرات، لأن هو كولشي فهاد الصداع لي ناض.