زهير المترجي تهرس ومجهودات كبيرة ديال الطاقم الطبي للوداد باش يرجعوه يلعب بسرعة

كيسعى الوداد الرياضي لاسترجاع المهاجم زهير المترجي فأقرب وقت ممكن من بعدما تعرض لإصابة صعبة الأحد الماضي، فماتش الحمرا ضد المغرب التطواني ضمن الجولة 11 من منافسات البطولة الاحترافية لكرة القدم.
وكيعاني المهاجم زهير المترجي اللي خرج من ماتش المغرب التطواني من بعدما ماركا الهدف الثاني وتوعت، (كيعاني) من كسر فالركبة وتمزق فليكامو ديالو، وراه بدا الطاقم الطبي ديال الوداد الرياضي معه مرحلة العلاج.
الطاقم الطبي ديال الوداد الرياضي كيحاول يقلص مدة غياب زهير المترجي ما أمكن حيث الفريق محتاج له، والمشاركة مع الحمرا فكأس العالم للأندية صبحت مستبعدة، واللاعب غادي يخضع لفحوصات جديدة السيمانا الجايا باش تحدد مدة الغياب ديالو بشكل دقيق.