غريب. شركة "اڤان سين" ربحات تنظيم الموندياليتو واخا ما متخصاش فتنظيم الانشطة الرياضية واخراج الافتتاح تعطى لمخرج ما فيدوش سميتو بريطل

الشركة اللي ربحات صفقة "الموندياليطو" اللي غادي يتنظم فالمغرب شهر فبراير 2023 هي "اڤان سين" ديال ابيدزير. هاد الشركة ما مختصاش فتنظيم الملتقيات الرياضية. ما عندهاش تجربة كبيرة. تنظم مؤتمرات وملتقيات وانشطة غير رياضية.
هاد الشركة الرباطية ولات تقريبا محتكرة كاع الانشطة لكبيرة فاي ميدان. كتخدم بزاف مع وزارة الداخلية وحتى باقي الوزارات.
الموندياليطو ماشي بحال الانشطة الاخرى. ايلى قوداتها تبان بالزربة. ايلى دارت تنظيم مزيان يبان بالزربة كذلك.
"أڤان سين" كانت تنافسات مع شي جوج شركات بيضاوية اخرى متخصة فتنظيم احداث رياضية وهي ربحات.
فموضوع عندو علاقة بهاد الشي٬ علمت "كود" ان رئاسة اللجنة التنظيمية لهاد الموندياليطو خداها العضو الجامعي حمزة حجوي اللي هانتو صندوق الايداع والتدبير باش عطاتو قبل ايام الادارة العامة للباركينگ ديال المجموعة. حجوي داخل للجامعة كمسير لنادي الفتح الرباطي.
واللي خدا الاشراف على التنظيم الداخلي هي اسماء العلوي مسؤولة المشتريات بالجامعة الملكية المغربية لكرة القدم. هادي كاينة غير بوحدها ومتحكمة بهاد المديرية. مزيان يكونو معاها ناس.
وفعلاقة بالموندياليطو علمت "كود" انه يتوقع يكون يوسف بريطل هو اللي غادي يتكلف بالافتتاح فالجانب الفني. اي مخرج الافتتاح. هادا جابتو "اڤان سين". شي كيعطي لاسانسور لشي فالرباط.
هادا مخرج على قد الحال. تشهر باخراج فيلم قالو على الصحرا. طلع فيلم فاشل كيبين محدودية هاد السينمائي اللي كان بدا فالتمثيل وبدا ديما ممثل من الدرجة الثانية فالمغرب
حشومة بحال هادا يتكلف بمهمة بحال هادي. خاص فنان مبدع يكون راقص بحال لحسن زينون. هاد الفنان خدم علي التراث المغربي. عندو تجارب كبيرة فالرقص. كيفهم مزيان فالايقاعات المغربية والدولية. كيفهم لغة الجسد. راه ماشي ب"كنعرفك" و"صاحب شي مسؤول او مسؤولة كبيرة" تقدر دير شي حاجة.
راه حدث عالمي لبلادنا. طلعو النيفو ويجيبو الطوب وما ترجعوش شي وحدين حضرو لمونديال قطر بحال بنشليخة اللي كان دخل ليها بريطل عند الوزير بنسعيد باش تاخد الفيزا. باراكا من العلاقات وفكرو فالبلاد