حشومة الافتتاح الرسمي لجناح المغرب يكون بوفد ضعيف. هادي نتيجة توزيع الصفقات على فاشلين وفاشلات

البارح السبت تم الافتتاح الرسمي لجناح المغرب فالمعرض العالمي "إكسبو دبي 2020". معرض دولي غادي يبقى حتى 31 مارس ومشارك فيه 192 دولة.
الافتتاح كان ضعيف مواكبة وحضور. حشومة جناح مغربي ما حضرش ليه لا ولي العهد لا الامير مولاي رشيد ولا حتى شي اميرة من الاميرات بحال اللي وقع فدورات سابقة. حدث بحال هادا خاصو يحضر ليه رئيس الدولة كاع.
اللي حضر وزراء تالفين يالله تعينو ولمغاربة مازال ما كيعرفوهمش. كانت نادية فتاح باعتبارها المندوبة العامة للجناح المغربي في المعرض. دابا وزيرة الاقتصاد والمالية. كانت وحدة عايشة فاوربا لسنوات وجابوها للسياحة وهي فاطمة الزهراء عمور وزيرة السياحة والصناعة التقليدية والاقتصاد الاجتماعي والتضامني. اييه كانت هي مندوبة المغرب فدورة ميلانو لهدا الحدث النيت.
حضر كذلك وزير التجارة والصناعة رياض مزور. حضرو مدراء شي مؤسسات عمومية وشي وحدين كيمثلو الباطرونا. كلشي ماشي الصف الاول من هاد المسؤولين.
هادو ما يمكنش يبيعو المغرب. صورة المغرب. ما يمكنش يجيبو الاضواء باش نسوقو إنجازات المغرب في الميادين الاقتصادية والعلمية والفنية والثقافية .
المشكلة فهاد المعرض بدات مع المهندس ولد الوزير فتح الله والعلو. مهندسون مغاربة ما فهموش غير هاد المهندس اللي كياخد الصفقات.
ثم كانت مضاربة بين هاد المهندس وبين وحدة ضاصرة كثر وهي مريم ابيدزير مولات شركة ليڤيمونسيال "اڤون سين". ضاربو على بناء المعرض. مولات الشركة بغات تبني الرواق والمهندس قال ليها هاد الشي ماشي شغلك.
هاد ابيدزير دات كلشي. خدات مارشي كبير فيه حتى العلاقات العامة. هاد الشي علاش فشلو يسوقو هاد الحدث حتى داخليا. اللي كتخدم مع هاد مريم دايرة صحابها وصحاباتها.
جناح خسرو عليه فلوس صحيحة وجا نهار المغرب وفشلو يجيبو وفد حكومي كبير. رئيس الحكومة مشارك فقمة المناخ ما يقدرش يحضر ولكن وزرا خراين ممكن يحضرو. ماشي هاد الوفد الفقير اللي فيه وزرا تالفين.