وسمعو يا لمغاربة. قال ليكم لمجرد كيحتارم المرأة. فمحاكمتو: كنربح ما بين 10 و15 مليون للشهر واستهلكت الكوكايين مراتو: كيحتارم لمرا وما بغاش يجبد اغتصابو لامريكية ف2010 وليلة القضية بقى يغوت: انا نجم انا فنان

اليوم الاثنين 20 فبراير بباريس بدات محاكمة سعد لمجرد فقضية اتهمات فيه فرنسية باغتصابو. القضية كترجع ل26 اكتوبر 2016 والمشتكية اسمها لورا ديك الساعة عمرها 20 سنة قدمات بيه شكاية تتاهمو بالاغتصاب فاوطيل ماريوت بباريس وبالضبط فالشومبر 714.
حسب « ار ام سي » فالفتاة باش دخلات مخلوعة مع ماماها وبكات باش شافت « مغتصبها ».
فهاد الجلسة كشف حارس فهاد لوطيل باللي فديك الليلة كان الدم والكوكايين وباللي لمجرد كان فحالة هستيرية وكان كيغوت "انا نجم انا فنان"
فهاد الجلسة اللي بدات مع الصباح وما سالات حتى لعشية٬ هدر لمجرد قدام المحكمة على اغانيه٬ قال باللي ابداعاتو دارتها باش يبين ثقافة بلادو =المغرب= فاطار احترام كبير للمرأة وباللي هاد الاغاني ديالو كتهدر على الحب والعلاقات بين الازواج.
فهاد المحاكمة وفق نفس المصدر الاعلامي٬ قال لمجرد باللي « ديما بغى يعبر علي وضعية المرأة. وضعية ايجابية من خلال لباسها وشكلها وجمالها واناقتها » وان « المرأة والمرأة المغربية على الخصوص معروفة بذكاءها وباللي كتكمل الراجل وباللي اغلبية جمهورو من لعيالات.
طبعا باش يحاول يعطي انطباع ايجابي جات مراتو غيثة. دخلات معاه. حتى هي هدرات٬ قالت فدفاعها عليه باللي سعد كيحتارم النساء وباللي ما عمرها سمعات باللي عندو شي مشكلة مع شي بنت. وباللي راه بريءهاد البريء راه عندو قضية ف2010 وهاد غيثة فراسها. قضية فميريكان وبعدها قضية فالمغرب ف2015.
باش جبدها =قضية ميريكان= ليه القاضي رد عليه « باللي باغي يركز غير على هاد القضية » محاميه كذب باش قال باللي القضية تسدات ورد عليه محامي لاورا باللي تسدات باش خدات المشتكية لفلوس
فهاد الجلسة ديال محاكمة لمجرد اكدات مراتو باللي سعد كياخد بعض المرات لادروگ "على حساب مع من سهران". هو براسو اكد باللي ف26 اكتوبر 2016 بماريوت خدا الكوكايين وباللي ما اغتاصبش لورا. لمجرد كان قال للمحققين يوم الحادث باللي كان غير البوسان