ها لائحة الوداد لماتش لوصيكا وكاريدو باغي يفتح صفحة جديدة مع اللاعبين

قرر الإسباني كارلوس كاريدو المدرب الجديد للوداد الرياضي يعطي الفرصة لجميع اللاعبين بالفريق يبينوا على الإمكانيات ديالهم واستدعاهم كاملين ليماتش ضد أولمبيك خريبكة اليوم فالعشية، بمن فيهم حمزة ايت علال اللي كان موقف من إدارة النادي قبل الانفصال عن المدرب السابق المهدي النفتي.
وحدد كاريدو لائحة مكونة من 22 لاعب لماتش الوداد الرياضي وأولمبيك خريبكة عن الجولة 19 من الدوري الإحترافي المغربي، وكيغيبوا عليها فقط اللاعبين اللي عندهم إصابات فحال رضا الجعدي وزهير المترجي، وهادشي كيأكد أن المدرب الجديد جاي باغي يفتح صفحة جديدة مع الفريق.
وكتكون لائحة الوداد الرياضي من التكناوتي، موريد، العملود، الندراني، فرحان، أبو الفتح، زولا، عطية الله، أيت علال، الداودي، حيمود، جبران، باعوش، الحسوني، إ.المترجي، اللافي، أوناجم، بوسفيان، أوك، بوهرة، لامكيل زي، صامبو.
وغيبدا ماتش الوداد الرياضي والضيف ديالو أولمبيك خريبكة مساء اليوم الثلاثاء مع 8 و 30 دقيقة فستاد دونور بكازا، والحمرا معولة على الرباح وتحقق انطلاقة مزيانة مع المدرب الجديد كارلوس كاريدو اللي هذا هو أول ماتش له مع الواك من بعدما وقع فالفريق الأحد الماضي.