بلادي يا لمزوقة من برا ...

بلادي يا لمزوقة من برا
آش اخبارك من الداخل
1976
اللي ركب دابا ينزل
واللي اسمن دابا يهزل
لاباس لاباس
لا مقدم لا عساس
لا تعظم امَّالين الجاه
الرزق ضامنو ونْتَ مولاه
خَيِّي لا تكون حرّان
العود الحران ما يدير مزية
شوف أش بعَّدْ شفري من عينيّا
خيي لا تكون قرّان
ولا تتعجب
إيلا شفتها ترضع بنتها ذيك البڤرة
ماشي السّبق بالتعنڤيرة
وماشي الشان بالتفرفيرة
ولا تدير مادار الذيب في البحيرة
كال ما قيّس
حاصل يتبحصص
ولا تدير ما دارت رحمة
صيْكَّت وحطّات لحمة
صياد النعامة يلقاها يلقاها
الاولى آها
والثانية آها
والثالثة آها ،
اللَّوْلى آها على اللي هزت بنتو السيف وما خلاَّها ،
وڤال ليها صبري
حتى تجي النقرة فين يغبر نحاسك
وعرات صدرها للريح
راكبة عود وملجماه بسبيبو ،
وسالفها اداوه ، ما جابو ما خلاّها تجيبو .
والثانية آها على اللي زرع الزارع غلتو
ومن عينو دار ساڤية وسقاها ،
وڤلبو حطو وسط الدرسة ودرّاها
وجا هو وجمع الحصيصة وادّاها .
والثالثة آها على اللي ڤال كلمتو وما وْفاها
ونغّصنا ويتّمنا وابَّاتنا حيّين :
البو حط ڤصعتو وما كلاها
تفكر وليداتو : شي في ذاك البر ملاوح ،
شي مطرقين عليه
شي في الزناقي سارح .
آها .. آها .. آها وميات آها
على بلادي توجعت لا من سقاها.
إيلا كان شي ڤيد في رجلي
راهو بلادي ،
ويلا كان شي تاج على راسي
را هو بلادي .
بلادي حالتك حالة
وليتي يتيمة وهجالة
ازمانك ما خلاو فيه رباح
آح . آح .. كلشي يجري ويڤول آح
العاقل داير وتيّر ولَّى مدّاح
والفقيه داير مضمة ولَّى شطّاح
والشريفة خدامة في الملاّح
والسلوڤي ولّى نباح
واللي نتسناو بركتو ولّى ذبّاح
والشريحة زادت سومها سوم التفاح
ويلا ڤلنا حقنا فين ؟
يڤولو بَّاح
زمانك يا بلادي زمان العجايب
مزوقينك كيف الطعريجة
واللي هضر يڤولو عليه سايب
فيك النحل هجوه من الزرايب
والشايب مخدمينو للبيعة والغرايب
دايع كيف الشيح
كاسر ودنو للريح
التسبيح في العنق عربون المسلم
حطو ليه الدواية حطو ليه القلم
وزيدوه يڤول كلمة حق
والله ما يڤول غير اللي تعلّم
يغمض عينيه ويسد وذنيه ويزم
ما شاف ما سمع ما تكلم .
بعض الناس كالزَّواق
ها الشعارات ها النفاق
بلادي ولات قيسارية
تيفصلو فيها الوطنية
في السفارات كيڤليزيو الشرَكية
البايرة اللي بغات تدور بحالتها
تسلف قميجة وتڤول هالشرَكية
بلادي بلاد الطاسة والسيبة
بلاد المواسم وهزان البوط
بلادي مزنة غامقة ما عرفنا آش جايبة
بلادي بلاد التيرسي والزفوط
بلادي واد حامل مستور
بلادي دحيّش قصيور محڤور
بلادي شاهدين فيها بالزور .
بلادي يا لكويفرة عرّي على غنبورك
يا السندافة يالعاطية خيرك لغيرك
بلادي بلاد العمامة والهنكارة
بلاد الكمية والشكارة
بلاد البرارك والقصور يا خسارة
بلاد القواويد والسمسارة
بلاد الألبة والهومارة
بلادي محدودة بالبحر والبحر اهبيل
بلادي عطشانة وما البحر قليل
بلادي عزيبة مدحية في الغابة بالليل
بلادي حمامة تنوح على فراق الخليل
بلادي الگور فيك فرعنو
وامّاليك في المقابرادّفْنو
رمادهم ولّى فاسفاط ،
وتشتو في البحاير وفنّو
قبالتهم هيشة حاضيها صاط .
بلادي عوق فيك لحمار في قاع لبحر
وخالتي موكة تسلطنات على عمي النسر
والبغلة فيك ولدات وسمات
نهار ڤالو العديان
ها طرح النمّوقراطية .
ها السليخ ها الذبيح
ها لقطاطعيا معرسين بالشَّرَكية
هالنَّم ها البكور ها عَبُّو الريح
ها لشريحة هندية
القطاطعية والتحرير
والمخزن والعادوليا
ابحال الطرطير
والصباغة الهندية .
بلادي ق .....عطاية .....
وامَّاليها خرقة طرّافة
بلادي بڤرة مذبوحة والجناوة فيها نتافة
خيرها صارطاها غولة جرجافة
على الدم ونص العزارة قفقافة
الميركان تيتوحم اعطيوه يلعب على بلادي
التوريس المجراب جيبوه يطنز في بلادي
الراس الأشهب مدڤوڤ تفك خبالو بلادي
خوتنا في الرمل والليسانس بغاو يزهاو
ها البورديل في بلادي .
بلادي بلاد الجوامع والبيران
حدودها من الجاهلية حتى للميركان
التسبيح والسينما العريانة
الموضة والرجل الحفيانة
بلادي بلاد المواسم والجذبة
بلادي فيها ناسها غربة .
بلادي بلاد الحرمل والشبَّة والغراب
بلادي بلاد التبوريد وبوسان التراب
بلادي شمسك مخبياها حتى يجي لفجر
شمسك ما تخلقت للسواح ،
حاملة بدراري ما تخلقو سيرورات
بيدهم الوريقة مولات الرباح .
بلادي بلاد السويسي ودوار لاحونا
بلادي بلاد الكريانات والعمارات العريانة
بلادي بلاد الانتخابات والحباسات
بلادي بلاد النقابات والشيخات
بلادي بلاد الزرود والقهرة
بلادي بلاد الجذبة والحضرة .
زمانك يا بلادي حق المسكين فيه طاش
زمانك يا بلادي ما فيه لا هْنا ولا مْعاش
اشتف هيتف
الصغير تلف والكبير تلف
اللي تنتف ما بغى يخلف
الهم بوحدو ما بغى يخرف
مول العشرة بايت تحت شجرة
مول العشرين بايت غارق دين
مول المية تيرقع في الرمية
مول الألف تيحسب وتالف
مول الكيران بايت يحسب وراسو عريان
ها لجواري يهَرُّوه ها لغمان
مول المليار راجل مطيار
يبيع ويشري في الغاشي ومطرقو بالمسمار
زمانك يا بلادي كثرو فيه الدعاوي
تعاندو على الزْواق والكساوي
وخْلاو الصح وعمرو لقهاوي
زمانك يا بلادي زمان الهتوف
الماضي فيها عاطيها للكيوف ،
والفقيه يشهد بالزور
حتى هو نظّم حياتو في البنكة
يسبّح ويبحلق في الحتاية
ويفهى .. ويشوف .
الڤافلة زايدة شي سبقها شي تلّى
والحملة صعيبة ،
كيّت من ساڤتو كيّت من تلى
واللي سبقها غير ينطّعْ
كيف القرد قاعو منتوف
فين دار يلقى عليه الهتوف ،
الخيالة مسرجين
ومحزمين بالبارود والسيوف .
.........
كيّت من ادّاها في التبرگيگ واتلّى
أوطار وعلّى گاع ما ولّى
تعراو كتافو في واد خالي ،
ابحالو ديما يتعافو
كيت اللي علّى في جرف عالي
وفاق ولقى راسو في واد خالي .
بلادي شافوني محڤور
وادحاوني اللُّور
سماوني حافة خايب الزلافة
ارماوني في الظلام
وسولوني واش نشوف ؟
قلت لاّ ،
قالو ياك أنت غير حتروف .
سماوني عيفة
خايب السيفة
وسندو راسي على جيفة
ولبسوني دربالة
وادحاو فيها المطوي والكيف .
.............
تململت في واد خالي
وعيطت أنا في حماك البودالي .
ڤالو حطو على عنقو السيف
عيفة ويعاف
وخْراجة ويخاف
وها نا يا بلادي في زمان رجالو قطاطعية
البانضي فينا هو الشريف ،
بلادي تقطع بي الحبل
وراسي مطلوب للسيف .
وَلِّيت غريب الدار ،
وزفطو عليا وڤالو عينيه زاغو
وعقلو طار ،
ڤالو لقيناه يخمم
شاعل الشمع بنهار .
الاولى في اللولات تيفكّر في التخريب
وتينظم في الأسرار
والثانية في الثانيات احمق
دواه ما لقاه طبيب
نصو سياسي مخربيق
نصو احمق بالتحقيق
والدليل ؟
كيقول : الأخ ، الرفيق .
........
لله يالداعيني وحاكمين عليا
لله يالقاتليني وباكيين عليا
إيلا كنت نخمم خممت في بلادي
والحفرة اللي حفرتو ليها ،
ويلا شعلت الضو بنهار
راه غلبتني ظلمة البراكة
اللي دفنتو خيي فيها .
بلادي زغرتي ثلاثة تزغريدات
اللَّوْلى فيها شبر
والثانية فيها شبرين
والثالثة ما بين السماوات والأرضين
لقاوني هاز حمل ثقيل
تهب الريح
و تعجبو علاش ما نميل ؟
راني يامّا كنت ريشة من اجناحك
راني ياما كنت قطرة من دم اصباحك
جيتك دموعي على خدي
عويني ريحك
مونسني الطير الحر
لله شكون نفرك
قسمي معانا الطريق
أنا رقّاص والحال مشات
والطريق تخرّج للغريب
(وشكون يڤول أنا ماشي برّاني ؟ )
حوزيني يا بلادي
راني مهجَّج بحال المجراب
حايحة نايضة عليّا
قطعت الواد طينو مغطِّيني
(ياك أمّا ، الواد اللي ادّاك يديني ؟ )
ركبت الموجة وأنا غريب
والموجة منفية بحالي
تركبني وُ نركبها :
الظلام لابسنا بجوج ،
رايح تالف بين الرْدامي والجْوالي
وبين اهبال الموج ،
بلادي سايڤينها للسياف
ومّاليها يقراو اللطيف
بلادي تْسُوس في نقرتها
ومّاليها يعاودو ليها الخرّيف
بلادي حميمة فاضت عليها العين
وعُشْها ادّاتو الحملة ،
وضاوها بدموعها وفصلو الكفن
وصدّوها للقبلة ،
مستفين على راسها ، كُلاَّ يطل طلّة ،
هالمندبة ، ها لعرس ،
ها للي ضاربها بسلّة .
بيضها جرفو السدر وقرقت عليه لفعة
كلاب الڤرنة دايرين عليه محلّة ،
وليداتها بين حبس البيض ونياب اللفعة
وبين شوق امهم مقبلينها في المصلّة .
بلادي نخيلة عريانة للشرڤي ما عندها ساقي
بلادي بوهالية مطوفينها في الزناقي
بلادي بير ساكناه غولة مجرابة
محرزاه ما وصلوه ڤرّابة
بلادي إيلا غاب الزين يبقاو حروفو
بلادي عرّي على غنبورك نشوفو ،
بلادي وسط الگارة مرمي تيلادك
عليه الگزارة يطوفو .
بلادي امواجها مالقات شط
بلادي نخيلة ، اغراب نفّر منها لحمام ،
وڤالو كروش لحرام ، لمكتاب وفين يحط
وڤالو خليو الزلط جبيرة لولاد لحرام .
بلادي طاجين حامين طارو شقوفو
وايلا كذبتو دابا بعينيكم تشوفو .
آش هاذ لعملة داروها للدراري
باعوهم مع الخضرة ل Paris
واللي بقى حدو السبسي واللحية والكتابات ،
شي مخبي في تعمار الشوارج
شي في الانتخابات
شي منوض هيلالة في البارات .
وما حس بالمزود غير المضروب بيه ،
شعبي / شعبي ..
شعبي مضيوم
وقلوب لْكاياس يبيعو ويشريو فيه
يذبحوه ويسلخوه
يمشي في جنازتو يبكيو عليه
شعبي / شعبي ...
شعبي ڤالو ثور بڤرنو هاز احمل ثقيل
شي مشعبط فيه شي مدلّي شي معلّي ،
كُلاَّ يضرب احسابو باش يتڤاد الميل
والثور يطوّح ويرڤب علْ شمس
يڤولْ لها طلّي .
كيتكم يا لعمّالة نهار يڤطع الڤيد
والله زاد ما يولّي .
1976 ""
أحمد لمسيح