قصتي مع كوفيد وعودتي من الموت

كتب المواطن القنيطري محمد مخلوف في حسابه على فيسبوك قصته مع الإصابة بكوفيد 19، وكيف تطورت حالته الصحية بشكل حرج جدا، وما عاناه من صعوبة التطبيب وتعامل المصحة الخاصة.
وهذا نص القصة كما نشرها للموعظة والاعتبار:
"السلام عليكم جميعا،
والحمد لله اللذي بنعمته تتم الصالحات.
غادي نعاود ليكم قصة ديالي مع كوفيد 19 واللي دوزت فيها تجربة وراتني حوايج زوينين وحوايج خايبين.
الجمعة 13 غشت مشا ليا الذوق والشم مع حرارة كانت تاتجي وتاتمشي في اليومين الاخيرة انا مع شكيت وقبل ماندير تيست بديت البروتوكول ديال علاج كوفيد، ازيكس، فيتامين C و الزنك و الباراسيتامول..
نهار السبت تزاد عليا الحال و مابقيتش قاد نحبس الكحة دوزت النهار والليل مسخسخ مابقيتش قاد نتنفس لان الفيروس كان لاعب لعبو بلاما نكون عايق. الاحد في الصباح مشيت لبوليكلينيك كشفو عليا ولقاو الأوكسجين في الدم 88 في المائة. طلبات مني الطبيبة ندير سكانير وهنا بدات معانات اخرى كلشي ساد، قلبات المرى ديالي تالقات مختبر ممكن تعيط ليهم يجيو وبالفعل عيطنا ليهم وجلسنا تسنينا حوالي 45 دقيقه تاجاو و درت السكانير مني خرجات النتيجة المرى تخلعات و خبات عليا النتيجة وانا اصلا كنت سخفان ماقادش نحكر باش نقرى التقرير، 60 في المائة من الرية ديالي مشات وشد فيها التهاب من الجهة الخلفية من جيهة الضهر، رجعنا لبوليكلينيك بعد ماشافت الطبيبة التقرير طلبت من الزوجة ديالي باش نتنقل لمصحة خاصة لان حالتي مستعجلة وتاتطلب انعاش و اني خاصني اسعاف مزود بالاوكسيجين.
نصحاتها الطبيبة نصيحة اخوية قالت ليها بلاما تديه لمستشفى ديال المخزن الى بغيتي راجلك يعيش من اللخر.
رجعنا للمنزل والزوجة خدات ارقام اسعافات لكن انا قلت نهدر مع الاسعاف اللي دايرين لينا الخدمة عقدة تامين معهم بعد اخد ورد في الكلام دوزو ليا طبيبة بدات تاتسولني في التلفون قالت ليا واش عندك كوفيد قلت لها مادرتش التحليلة لكن حالتي تؤكد اني مصاب وانا على نيتي. بعد انتظار قالو ليا للاسف حالات كوفيد ماداخلاش في الاتفاقية (هذا موضوع نشوفوه من بعد ان شاء الله).
لقينا اسعاف طلب منا نصبرو شوية بين ما عمر القرعة بالاوكسيجين وحنا على اعصابنا و التنفس والو…
جات الاسعاف لباب الدار باش تديني للرباط و حنا هابطين بدات الزوجة تاتاصل بالمصحة ديال الشيخ زايد جاوبوها عرفو اش كاين قالو ليها ماكاينش بلاصة طلباتهم نجيو ونشوفو اش كاين قطعوا، من بعد مابقاوش تايجاوبو في التلفون، فاتاصلت الزوجة بعدة زملاء في العمل مشكورين على العمل الجبار والوقفة اللي وقفوا معايا مانساهاش ليهم طول عمري، قالو لينا نمشيو لمصحة السويسي لما وصلنا لقينا ماكاينش بلاصة عاود تاني، الزوجة ديالي دخلات عند مسؤول في المصحة وتوسلات ليه يلقى شي حل الا غادي نضيع من يديها، السيد تعاطف معانا وبدا تايتاصل بالمصحات اللي تايعرف تالقا واحد المصحة .A.R وقال لصاحب الاسعاف دابا طير بيه لاتعمر البلاصة.
هاد الشي اللي دار طار بيا وصلنا نزلني من الاسعاف ودخلني لغرفة الكشف ومشات مراتي باش تشوف معاهم الاجراءات الادارية.
اول شيء قالو ليها خاصو ينعس من 7 الى 10 ايام و الثمن 7 المليون فورفي.
جات عندي وهدرات معايا انا غير سمعت المبلغ ورغم الحالة الخطيرة ماقبلتش وفي نفس الوقت وصل صديق ديالي من كازا (أخ لم تلده لي أمي) وقف معيا الله يجازيه بخير و قنعوني بان صحتي هي الاهم قبلت ندخل وتفاوضنا معاهم على 6 الملاين بي 2 شيكات ضمان ديال 3 الملاين. عمرت المرى الوراق وطلعوني لغرفة تايسميوها "سويت " دارو ليا ماسك ديال الأوكسجين والسيروم في انتظار الطبيب. من بعد ما جا الطبيب وشاف السكانير عطاهم البرنامج ديال العلاج مضادات حيوية و مضادات لتختر الدم و كورتيكويد…
كان خاصني ننعس الليل كلو على كرشي مع وضع 2 مخدات وحدة تحت الصدر والثانية تحت الخصر ومخدة صغيرة تحت الرأس. السيروم في يد وجهاز الاوكسيمتر في اليد الاخرى وقناع على الانف والفم، بمجرد ماتنتقلب على كرشي تاتشدني كحة هستيرية ماتاتوقف على شي 20 دقيقة دقات القلب تايطلعو ل 120 ضربة و الأوكسجين تايهبط تال 72 بعض المرات، العرق في راسك و ضهرك وسدرك…
دخلت في حالة هلع و خوف شديد وليت تانفكر في الموت وتانقول واش مازال غانعيش ووليت تانفكر في وليداتي ومرتي وعائلتي و احبابي واش مازال غادي نشوفهم ونجلس معاهم؟
الطاقة تقريبا 5 في المائة ماتانتحرك في السرير غير بمشقة الانفس، الماكلة اكثر من 6 ايام عايش على السوائل الما والعصير الطبيعي (كان 2 اصدقاء تايجيبو ليا العصير ديال الدار الله يجازيهم بخير) المرحاض مرة وحدة نضت ليها تجيفت و تقطعات فيا النفس اللي خلاني اني نولي نقضي الحاجة ديالي في السرير.
مرشي ودراوعي كلهم ولاو مثقبين بكثرة الابر وولاو عندي تشنجات (كلاكاج) في جميع العضلات ديال الجسم.
الزوجة ديالي الله يسمح ليا منها طيلة 11 ليوم وقبلها بليلة هية 12 ليلة ماتاتشوفش النوم تاتعمر المنبه على كل 15 دقيقة باش تراقب ليا التنفس و تمسح ليا العرق و تشوف الى خاصني شي حاجة تال الصباح وتاكانفيق عاد تاتغفو شي سويعة ولا 2 مهما عاودت ليكم ماغاديش نصور ليكم المعانات ديالها والخوف والضغط اللي وصلات ليه.
خاص ترد البال مع الفرمليات حيت كاينين اللي مزاگلات شوية، وتراقب ليا السكري اللي طلع مع الكورتيزون و تخرج تقدا و توجد ليا الوجبات ديالي (ماكلت المصحة لا ترقى لهاداك الثمن اللي طلبو) وخاصها تجاوب على واحد الكم هائل ديال المكالمات والرسائل ديال العائلة والاصدقاء وزملاء العمل الى درجة وليت تانطفي الهاتف ديالي وديالها باش نقدرو نعسو…
بعد اليوم السابع بديت تانقدر ناكل و بديت تانحيد الماسك وندير التيو (lunettes) ربع ساعة ديال الكحة وتاناكل نعتق الروح شوية. بدا الالتهاب اللي عندي في الرية تاينقص وبدا الطبيب تاينقص ليا الدوى تدريجيا.
بقا الطبيب تاينزل ليا صبيب الأوكسجين من 20l/mn تدريجيا تا ولات 4l/mn في اليوم 10 مع 16h00 حيدت الأوكسجين وبديت تانتنفس من فمي ونيفي بدون ماسك واخة كان الأوكسجين ناقص شوية لكن بديت نحس براسي قادر نتنفس طبيعي فرحت وطلع ليا المورال و هدرات مراتي مع العائلة طمناتهم.
دوزت الليل بيخير و دوزت نهار تاهو ديال الغد واخة كان الطبيب باغي يزرب عليا حيت مع تاتخوى الغرفة تايجيبو ليها مريض جديد مني دخلت للمصحة عمر شي غرفة خوات كثر من وقت التنظيف وتغيير الغطاء و المخدات.
جا النهار المعهود اللي خاصني نخرج فيه مع الصباح جمعت مراتي الحوايج و الدوى… كنا موجودين مع 9 ديال الصباح نزلات عند الناس ديال المحاسبة وهنا غاتبدا معانات وحرب من نوع آخر و غادي نكتاشف الوجه الحقيقي ديال لوبيات الصحة و الفعايل اللي تايديرو في الناس بلا حشمة بلا حيا.
اول شيء انا طلبت البروفيسور المسؤول على باش تبقى المرى معايا مراقباني ومسانداني راه كاين بزاف المسائل اللي مايمكنش يديروهم لك الممرضات زيادة على العامل النفسي قال ليا صافي كون هاني. ومني جينا للخلاص قالك تزادت 4460 درهم ديال مرافقة الزوجة قلنا ماشي مشكل.
طلبو مني ان ادفع 64440.16 درهم و 30000 نوار اه ولينا في 9 الملاين ونص تقريبا وطلعو للجبل وبقاو عاصرين علينا النهار كلو تايجي المسؤول شوية تايجي الطبيب… باش يحسبو النهار اللي غادي نخرج فيه اتاصلت بالنقابة ديالي و جاو عندي بعد نصف ساعة 2 اخوة دخلو عند مصلحة المحاسبة و عطاوهم العاصير باش يزولو هاديك 3 الملاين اللي كانو غادي يديوها باطل و كتبت ليهم شيك اخر بمبلغ 64440.16 درهم وخديت 2 شيكات اللي فيهم 6 الملاين في انتظار تسوية الوضع وعطاوني ورقة الخروج و وصلوني الاخوان ديالي بجوج من المصحة تال المنزل ديالي وحنا جايين من الطريق السيار الى القنيطرة ماحيدتش عيني على الشجر اللي في جنب الطريق والسما و استنشقت الهوى اللي عمر السيارة من لداخل و ماحبستش من الحمد والشكر على النجاة ديالي من هاد المحنة.
دابا من نهار خرجت وانا مازال تانعاني من العواقب ديال الفيروس، مازال ماتانقدرش نهدر بزاف غير تانهدر تاتشدني الكحبة و تاينقص ليا الاوكسجين و تانعرق بزااااف، تانوض للمرحاض بزز ومني تانرجع للفراش معانات عاود تاني مع الكحة… كاين تحسن ملموس بالحق خاصني وقت للاستشفاء، الطبيب عطاني شهر قابل للتجديد وقال ليا تقدر تتعافى من هنا ل 3 اشهر تقريبا باش يرجعو الريات ديالك خدامين مزيان وتحيد منك السخفة.
تانشكر الناس اللي وقفوا معايا كاملين واللي تضامنو معايا و اللي تخلعوا عليا و اللي دعاو معايا في ضهر الغيب و اللي ساهموا معايا كل واحد باسمه.
تانشكركم على المكالمات و الرسائل و كل الحب اللي بينتوه ليا في هاد المحنة.
زوجتي ولو عشت عمر آخر لن اوفيك اجرك. ممتن انكي في حياتي ربي يحفظك ليا ومايحرمنيش منك يا رب
الحياة ماتاتسوا والو استمتعوا مع عائلاتكم وحبابكم بكل لحظة و تبادلو الحب و المودة، ماتضيعوش الوقت في البغض والحسابات الخاوية والكراهية.
وفي الاخير تانبغي نبهكم من خطورة هاد الوباء والواحد مايرخيش في راسو الى شك يدير تحليلة ويزرب على راسوا راه ماكاين لا تطبيب يحمر الوجه لا معاملة انسانية ماكاين غير الماديات و البزنس المريض بالنسبة ليهم مجرد رقم او زبون.
ناكلوا اغدية متوازنة طبيعية باش تتقوى المناعة ديالنا و نتاخدوا التدابير المعمول بها ونقصوا من التحركات ديالنا.
الله يرفع علينا هاد الوباء".
#COVID19 #كوفيد