السيمانة الإنتخابية

على بلاد مهمشة دويت والسبب
هاديك لي يسميوها " ديمقراطية "
قالو نرجعوزمان افلاطون مول " الجمهورية"
الشعب هو الحاكم بقرار الأغلبية
لي ظن راسو يخدم المصلحة
يدخل الحملة الإنتخابية
*******************
بدات الحملة يوم الحد
ووجد وراقو شحال من قرد
وعينو غير على الميزانية
*******************
صباح الإثنين ولا كلشي حنين
تسمع غير خويا ، وصاحبي و " الزين "
والشارع الوحيد عمر بالأزبال الوقية
فالعشية يحضرو الفنانة و البنادر
كل واحد برباعتو خدام المسرحية
*******************
جا الثلاث و القضية سخنات
و الحرب بدات تقساح شويا
لي قديم يبرر الفشل بتفاهات
و الجديد يقول عطيو الفرصة ليا
انا نيتي صافية وقصدي شريف
عليكم معول عنداكم تخونو بيا
انا عندي مايدار غير بقيتو فيا
ياك ديما معاكم فالبلاد وغاتلاقاوني
نصلي فالصف الأول ونزور الأوليا
غاندير ونفعل... واقيلا بعصا سحرية !
*******************
فرمشة عين دخل الاربع وكلشي بدا يتخلع
لي عندو شي حصيصة بدات تبان
والحملات فالزناقي المضيقة تستغل الصبيان
قولو " فلان" هو ديالنا و الباقي عديان
وراق تتفرق على ناس يعرفو منها غير التصاور
عليهم تكالب الفقر وقلة الوعي و القراية
مجرد خزان انتخابي يشريوه بالتضاور
*******************
جيتي مرحبا يانهار الخميس
وبدا يوجد سلاحو كل ابليس
يلبس احلى ماعندو سيدنا " لمورشيح"
ويبدا فالمنصة علينا يزرع الريح
خدم فيها ذكي وختار يوم الحافة
تناسا زارع الريح يحصد العصافة
*******************
الجمعة تجمع و المومنين يطلبو الله
والشياطين عينيها على الصنادق
هدا ديالنا وهدا ماصوتش ونافق
*******************
صباح السبت فالمرشحين الضربات بردات
لي دا شي داه ولي زلق جا على عين قفاه
الخاسر يقلب على الاسباب باش يبرر
ولي داز للصندوق بدا يخطط ويدبر
السيارة ... والفييلا ... والعطلة فاكدير
اما نتا وانا ونتا والاخر مجرد حقير
تهنينا من كمارتو على الأقل اربع سنين بعدا
خليه يعاني مع لاميزير عاد نوجدو ليه العدة
باختصار الديمقراطية هي هادي
التشلهيب و النهب والفساد امر عادي
القنافد كلها حرشة مافيها املس
نوصيك ونوصي راسي قبلك
ونوصي عليها الميت والجاي
والغاااااااااااااااااااااااااااااااااااااااااااااادي